«Թուրքիայում կառավարություն չկա, կա ավազակախումբ, Ալլահը թող բոլորիդ պատիժը տա». ընդդիմադիր կուսակցության առաջնորդը վարչապետին
Թուրքիայի քրդամետ Ժողովրդադեմոկրատական կուսակցության ղեկավար Սելահաթթին Դեմիրթաշը խիստ քննադատության է ենթարկել երկրի իշխանություններին` քրդաբնակ շրջաններում սկիզբ առած բռնությունների և ձերբակալությունների համար:
Դեմիրթաշն իր խոսքն ուղղել է երկրի վարչապետ Բինալի Յըլդըրըմին և բացականչել. «Կառավարություն չկա, կա ավազակախումբ: Չե՞ս ամաչում, չե՞ս ձանձրանում: Ալլահը թող բոլորիդ պատիժը տա»:
Այս մասին գրում է թուրքական diken.com.tr կայքը:
Հիշեցնենք, որ օրեր առաջ ձերբակալվել է Դիարբեքիրի քաղաքապետ Գյուլթան Քաշընաքը: Նրան ձերբակալել են «Քուրդիստանի աշխատավորական կուսակցություն» խմբավորման դեմ իրականացվող գործողությունների ընթացքում: Քաղաքապետը մեղադրվում է քրդամետ քարոզչություն անելու և քուրդ զինյալներին ֆինանսավորելու համար:
ՔԱԿ-ը քրդական կազմակերպություն է, որի հիմնական նպատակն է զինված պայքարի միջոցով Թուրքիայի հարավարևելյան, Իրաքի հյուսիսային, Իրանի հյուսիսարևմտյան և Սիրիայի հյուսիսարևելյան տարածքներում հիմնել քրդական անկախ պետություն: Թուրք-քրդական հարաբերությունների սրման հերթական փուլը սկսվել է 2015-ի ամռանը:
Կազմակերպությունը 1978 թվականին հիմնադրել է Աբդուլլահ Օջալանը, ով ներկայում ցմահ ազատազրկում է կրում թուրքական Իմրալը կղզու բանտում, սակայն շարունակում է համարվել կազմակերպության ղեկավարը։