Ուրֆայի համալսարանի նախկին ռեկտորը ձերբակալվել է օդանավակայանում փախուստի ճանապարհին
Թուրքիայի Շանլըուրֆա (պատմական Ուրֆա) քաղաքի օդանավակայանում ձերբակալվել է պրոֆեսոր, «Հարրան» համալսարանի նախկին ռեկտոր Հալիլ Մութլուն, գրում է թուրքական diken.com.tr կայքը:
Մութլուն մեղադրվում է Թուրքիայում հուլիսի 15-ին տեղի ունեցած հեղաշրջման փորձի գլխավոր կազմակերպիչ համարվող թուրք կրոնական քարոզիչ Ֆեթուլլահ Գյուլենի խմբավորման հետ կապ ունենալու և հեղաշրջման փորձի կազմակերպմանը մասնակցելու համար:
Հիշեցնենք, որ հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, որը ներկայում բնակվում է ԱՄՆ Փենսիլվանիա նահանգում: