Ինչո՞վ է բացատրվում Թուրքիայի արձագանքը Ղրիմում կայացած «ռուսական» ընտրություններին. Газета-ի անդրադարձը
Անցած շաբաթվա ընթացքում Թուրքիան մի քանի անգամ հայտարարել է, որ չի ճանաչում Ղրիմում անցկացված ՌԴ Պետդումայի ընտրությունների արդյունքները: Այդ մասին ասել է նաև Թուրքիայի նախագահ Ռեջեփ Թայիփ Էրդողանը:
Անկարայի արձագանքն առաջին հայացքից չի համապատասխանում ռուս-թուրքական հարաբերությունների վերականգնման ինտենսիվ գործընթացին, գրում է gazeta.ru-ն:
Սեպտեմբերի 21-ին՝ Պետդումայի ընտրություններից երեք օր անց՝ ՄԱԿ-ի Գլխավոր ասամբլեայի 71-րդ նստաշրջանի շրջանակում Թուրքիայի նախագահ Ռեջեփ Թայիփ Էրդողանն իր ելույթում հայտարարել է, որ Անկարան չի ճանաչում Ղրիմի նկատմամբ Ռուսաստանի իրավասությունը: Էրդողանի այդ հայտարարությունը կարելի է կանխատեսելի անվանել: Թուրքիան ՆԱՏՕ-ի անդամ է և հետևում է դաշինքի քաղաքական ընդհանուր կուրսին:
Նույն օրն Էրդողանն Ուկրաինայի նախագահ Պյոտր Պորոշենկոյի հետ հանդիպման ընթացքում նշել է, որ Թուրքիան չի ճանաչի Ղրիմում ընտրությունների արդյունքները: Պորոշենկոյի մամուլի ծառայության հաղորդմամբ՝ Էրդողանը հայտարարել է, որ Անկարան կշարունակի Ուկրաինային աջակցություն տրամադրել ինքնիշխանության և տարածքային ամբողջականության վերականգնման հարցում:
Նրանց տվյալներով՝ չնայած Ռուսաստանի հետ հարաբերությունների վերականգնմանը՝ Թուրքիայի դիրքորոշումը որպես ռուսական տարածք Ղրիմի կարգավիճակը չճանաչելու հարցում չի փոխվի:
Տեղեկացված թուրքական աղբյուրի խոսքով՝ Էրդողանի պանթյուրքական հռետորաբանությունն ուղղված է Թուրքիայի հասարակությանը:
«Դա Անկարայի պաշտոնական և սպասելի դիրքորոշումն է: Ինչո՞ւ են Թուրքիայի ներկայացուցիչները և Էրդողանը վերջին օրերին այդքան հաճախ դա կրկնում: Թուրքիան այժմ ունի մի քանի տարաձայնություն Ռուսաստանի հետ սիրիական գործողության հարցում: Բացի այդ, Ղրիմի թաթարները բավական ուժեղ լոբբի ունեն Թուրքիայում: Թուրքական մամուլում այժմ գերակշռում է այդ մեկնաբանությունը»,- ասել է նա:
Ինչպես նշվում է հոդվածում՝ երկրում հեղաշրջման տապալված փորձից հետո Արևմուտքի հետ հարաբերությունների վատթարացման ֆոնին Ղրիմի խնդիրն այն փաստարկներից մեկն է, որը թույլ է տալիս Անկարային հավասարակշռություն պահպանել Ռուսաստանի և ԱՄՆ-ի շահերի միջև: Թուրքիան շահագրգռված չէ ՆԱՏՕ-ի և Արևմուտքի հետ լուրջ ճգնաժամի հարցում:
Հիշեցնենք, որ հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, ով ներկայում բնակվում է ԱՄՆ Փենսիլվանիա նահանգում: