Թաիլանդում ուղևորատար նավը կողաշրջվել է. կա 13 զոհ
Թաիլանդում երկհարկանի նավը բախվել է բետոնե կամրջին և կողաշրջվել, ինչի հետևանքով առնվազն 13 մարդ է զոհվել:
The Guardian-ի փոխանցմամբ` նավում, որը շրջագայություն էր իրականացնում երկրի կենտրոնական մասով հոսող Չաո Ֆրայա գետով, շուրջ 100 ուղևոր էր գտնվում:
Միջադեպի վայրում որոնողա-փրկարարական աշխատանքներ են ընթանում: Նշվում է, որ 10 մարդ անհետ կորած է համարվում:
Օրվա մութ ժամերին փրկարարական աշխատանքները բարդացնում է հորդառատ անձրևը:
Հաղորդվում է, որ վթարը տեղի է ունեցել այն պահին, երբ նավապետը փորձել է խուսափել մեկ այլ նավի հետ բախումից: