Շատ շենքեր այս սխեմայով արդեն կորցրել ենք. ճարտարապետները «Զվարթնոց»-ի հին մասնաշենքի մասին
Ճարտարապետների միության նախագահ Մկրտիչ Մինասյանը և ճարտարապետ Սաշուր Քալաշյանն այսօր մամուլի ասուլիսին անդրադարձան «Զվարթնոց» օդանավակայանի հին մասնաշենքի ապամոնտաժման խնդրին:
Մկրտիչ Մինասյանն ասաց, որ իրենց նպատակն է, որ «Զվարթնոց» օդանավակայանի հին մասնաշենքը պահպանելը: Նա նշեց, որ պայմանավորվածություն են ձեռք բերել, որպեսզի կոնցեսիոների խումբը ևս մեկ անգամ հանդիպի ճարտարապետներին, սակայն դեռևս այդ հանդիպումը չի կայացել:
«Նրանք չեն ուզում հանդիպել, և եթե դա արհամարհանք է, ապա այդ վերաբերմունքը շատ վտանգավոր է: Նախապես ասվել էր, որ շենքի աշտարակային մասը, մեծ շրջագիծը աշխատելու են պահել, սակայն կյանքը ցույց է տալիս, որ փոքր քանդումները հետագայում կարող են բերել մեծ քանդումների»,-ասաց նա և նշեց, որ դիմում են իշխանություններին, որպեսզի կոնցեսիոներին կարգի հրավիրեն:
«Սա առաջին դեպքը չէ, նման բազմաթիվ շենքեր այս սխեմայով արդեն կորցրել ենք»,-ասաց նա և նշեց, որ քանի որ «Զվարթնոց»–ի հին շենքը ներառված չէ պետության հուշարձանների ցանկում, դրանով այն անպաշտպան է։ Ըստ նրա՝ Մշակույթի նախարարությունն այստեղ որևէ դերակատարություն չունի:
Սաշուր Քալաշյանը նկատեց, որ կոնցեսիոների ներկայացուցիչները քանդելու համար ոչ մի պատճառաբանություն չի ներկայացնում: «Դրա համար էլ, ըստ երևույթին, խուսափում են հանդիպումից»,- ասաց նա և նշեց, որ քանդելու անհարժեշտություն չեն տեսնում:
Ճարտարապետ նաև ասաց, որ իրենք ցանկանում են ճանապարհ գտնել շենքը պահպանելու համար և գտել են, սակայն կոնցեսիոները հրաժարվում են հանդիպելուց: Ըստ նրա տեղեկությունների՝ կառավարությունը հրահանգել է չընդլայնել հուշարձաների ցանկը, քանի որ դրանց պահպանումը խոչընդոտ է հանդիսանում:
«Կռիվը գնում է մեր և կոնցեսիոների մեջ, իսկ կառավարությունը իր բոլոր օղակներով կողքի է կանգնած և ոչ միայն կողքի է կանգնած այլ նպաստում է, որ կոնցեսիոներն իր նպատակներն իրականացնի»,- ասաց նա:
Սաշուր Քալաշյանը նաև նշեց, որ ամբողջ աշխարհում ճարտարապետությունն է ազգային մշակույթի դիմագիծը: «Շենքը եթե քանդվեց, այլևս չի վերականգնվի»,-ասաց նա: