Եկեք պետբյուջե հասկացությունը փակենք, բյուջեի անունն էլ դնենք պարտքի վերադարձման գրասենյակ. Նիկոլ Փաշինյան
Այսօր Ազգային ժողովում ՀՀ Նախագահի կողմից ներկայացված Հայաստանի Հանրապետության և Եվրոպական ներդրումային բանկի միջև 2016 թվականի հունվարի 26-ին Երևանում և 2016 թվականի հունվարի 29-ին Լյուքսեմբուրգում ստորագրված «Հայաստանի Մ6 միջպետական ճանապարհ» Ֆինանսական պայմանագրի քննարկման ժամանակ ՀԱԿ խմբակցության պատգամավոր Նիկոլ Փաշինյանը՝ հիմնական զեկուցող Տրանսպորտի ու կապի նախարարի առաջին տեղակալին Արթուր Առաքելյանին հարցերով դիմեց:
Նա նշեց, որ համաձայն կատարողականի տվյալների՝ Հյուսիս-հարավ ավտոճանապարհի Արտաշատ-Երևան հատվածը շահագործումից կարճ ժամանակ անց երթևեկելի մի հատվածը փակվեց: «Ի՞նչն է պատճառը, որ հայբուդուրով շահագործման հանձնված ճանապարհը փակ է եղել շահագործումից առնվազն 5-6 ամիս անց»,-հարցրեց Փաշինյանը և նկատեց, որ վերջին շրջանում չի եղել որևէ ճանապարհաշինարարական դեպք, որ իրականացվեր ՀՀ պետբյուջեի հաշվին:
«Գիտեք ինձ ի՞նչն է զարմացնում, որ մենք 26 տարվա պետություն ենք, ու ոչ մեկի մոտ խնդիր չի առաջանում, հա դե ճանապարհը պիտի սարքենք, դե վարկ պիտի վերցնենք, բա ի՞նչ, բա լույսերը քաշենք, վարկ պիտի վերցնենք, բա զենք առնենք, հա դե վարկ պիտի վերցնենք, հա բա մեզ որտեղի՞ց էդքան փող, բա մեր պետությունը 26 տարի ինչո՞վ է զբաղված, եկեք ընդհանրապես ՀՀ պետբյուջե հասկացությունը փակենք, գնանք ամեն ինչի համար պարտք վերցնենք, բյուջեի անունն էլ դնենք պարտքի վերադարձման գրասենյակ»,-ասաց նա:
Արձագանքելով ասվածին՝ Տրանսպորտի ու կապի փոխնախարարը համաձայնեց, որ Հյուսիս -հարավ ճանապարհահատվածի երթևեկությունը դեկտեմբերին երկկողմանի բացվել է, սակայն որպես խնդիր հայտնաբերվել են մանր ճաքեր, որոնք էլ հետազոտվել են անկախ լաբորատորիայի կողմից: «ՀՀ-ն միակ պետությունը չէ, որը խոշոր ենթակառուցվածքների ներդրման համար փնտրում է երկար ու էժան փող»,-ասաց Արթուր Առաքելյանը:
Նիկոլ Փաշինյանը հեգնանքով հարցրեց, թե հնարավո՞ր է մյուս կողմում էլ թերություններ հայտնվեն, ու ճանապարհը ևս 4 օր փակվի: Նա նկատեց, որ շատերը հայտարարում էին, թե որակի խնդիր կա: «Էստեղ գալիս է այն հայտնի անեկդոտը, որը Հրազդանում անընդհատ պատմում էի, ասում է՝ տանիքը կապեցի, արհեստավորն էլ նենց լավ մարդ էր, նենց լավ մարդ էր, վերջում մի քիչ ժեշտ էր ավելացել, մի 30 հատ «վեդրո» սարքեց, ասեց որտեղ կաթի կդնենք տակը: Հիմա 6 ամիս է ճանապարհը բացվել է, դե երաշխիքային սպասարկում է, արդյունքում ստացվում է, որ հայտարարված բացումից հետո ճանապարհը փակվեց»,-նշեց պատգամավորը։