Էլդա Գրինին ցնցել է Պերմյակովի ասած մեկ նախադասությունը
2015թ-ի հունվարի 12-ին Գյումրիում Ավետիսյանների ընտանիքի 7 անդամների սպանության մեջ մեղադրվող Վալերի Պերմյակովը դատահոգեբանական փորձաքննության ժամանակ մի նախադասություն է արտաբերել, որը ցնցել է փորձաքննությանը մասնակցած փորձագետ Էլդա Գրինին: Այսօր լրագրողների հետ զրույցում ասաց, որ միտքը եղել է հետևյալը. «Եթե ես նույնիսկ մենակ չլինեի, միևնույն է, չէի ասի: Ճիշտ է, դա գուցե հենց այնպես է ասել, բայց …»:
Էլդա Գրինը նշեց, որ Պերմյակովի հետ բավականին երկարատև զրույց է ունեցել, բայց իրավունք չունի ասելու՝ ինքն է սպանել, թե՝ ոչ. «Նրա մեջ թաքնված մի բան կար, բայց պահվածքի մեջ տարօրինակ բան չկար, ընդհակառակը նա ուրախ էր, նույնիսկ շատ գոհ էր, որ հետը խոսում ենք, հետը մարդավարի ենք վարվում, շատ ուրախությամբ լրացնում էր մեր տված թեստերը, մի քանի անգամ ասացինք ճաշի ժամն է, եթե ուշանաս, էլ չես կարող ուտել, նա մնաց, չէր ուզում գնալ»:
Հարցին՝ թե իր կարծիքով ունակ է 7 մարդ սպանել, փորձագետը պատասխանեց. «Մի քիչ բնորոշ չէր: Հարցրել ենք, թե ինչպես է վերաբերում երեխաներին, նա ասաց, որ երեխաների սիրում է, սիրել է իր բարեկամների երեխաներին, ոչ մի ագրեսիվություն, զզվանք նրանց նկատմամբ չի զգացել»:
Փորձագետի խոսքով՝ Պերմյակովը միջին մակարդակի ինտելեկտով անձնավորություն է, նորմալ հիշողությամբ: Ըստ նրա արժանահավատ չէ նաև Պերմյակովի՝ սատանիստ լինելու վարկածը: