Մակրոնը, զանգվածային անկարգությունների ֆոնին, ժամանել է Նոր Կալեդոնիա
Ֆրանսիայի նախագահ Էմանուել Մակրոնը հինգշաբթի ժամանել է Նոր Կալեդոնիա՝ անկախության կողմնակիցների բողոքի ակցիաների ֆոնին և ասել, որ իր այցի նպատակն է աջակցել ժողովրդին և վերականգնել նրանց հանգստությունը, հաղորդում է AFP-ն։
«Այստեղ իմ նպատակն է կանգնել նախարարների և ողջ կառավարության կողքին՝ աջակցելու ժողովրդին... Ես եկել եմ այստեղ մեծ հարգանքով, խոնարհությամբ և զոհերի մասին մտքերով, ամեն ինչ անելու վճռականությամբ՝ հանգստությունը վերականգնելու համար», - ասել է Մակրոնը լրագրողներին։
Մակրոնը պետք է փորձի երկխոսության ուղիներ գտնել այն բանից հետո, երբ կղզու, կուսակցությունները հրաժարվել են նախագահի և վարչապետ Գաբրիել Աթալի հետ համատեղ տեսակենֆերանս անցկացնելու առաջարկը, իսկ բանակցությունների համար Փարիզ գալու առաջարկը անպատասխան էր մնացել:
Ինչպես հայտնում է Figaro հրատարակությունը, իրավիճակը կղզում շարունակում է լարված մնալ։ Հրդեհվել է երկու դպրոց և 300 ավտոմեքենա։ Ոստիկաններն ապամոնտաժել են ավելի քան 90 բարիկադներ ճանապարհներին։
Կղզու մայրաքաղաք Նումեայի օդանավակայանը շարունակում է փակ մնալ կանոնավոր չվերթների համար: Տարածաշրջանի շատ երկրներ, այդ թվում՝ Ավստրալիան, Նոր Զելանդիան և Ճապոնիան, կազմակերպում են տարհանման թռիչքներ՝ իրենց քաղաքացիներին տարհանելու համար։
Նոր Կալեդոնիան հատուկ ֆրանսիական համայնք է՝ տեղակայված Խաղաղ օվկիանոսի հարավ արևմուտքում Ավստրալիայից և ֆրանսիական մետրոպոլիտանից արևելք։ Վերջին շրջանում այնտեղ զանգվածային անկարգություններեն, ինչի պատճառով Ֆրանսիան ստիպված է եղել զորքեր մտցնել: Անկարգությունները Նոր Կալեդոնիայում դարձել են առնվազն չորս մարդու, այդ թվում՝ մեկ ոստիկանի մահվան պատճառ։
Ցույցերի պատճառը Ֆրանսիայի խորհրդարանի կայացրած որոշումն էր, որի համաձայն, ընտրելու իրավունք ունեցող անձանց շրջանակը Նոր Կալեդոնիայում կընդլայնվի։ Այսուհետ այն ընդգրկելու է նաև 1998 թվականից հետո այստեղ բնակություն հաստատած անձանց, որոնց մեծամասնությունը էթնիկ ֆրանսիացիներ են։