Իսրայելցի րաբբիները հայտարարել են, որ Ռաիսիի մահը «Աստծո պատիժ» է
Կիրակի օրը Իրանի հյուսիս-արևմուտքում մառախլապատ պայմաններում նախագահ Էբրահիմ Ռաիսիի ուղղաթիռի «կոշտ վայրէջքի» հետևանքով նախագահի և ԱԳ նախարար Հոսեյն Ամիր Աբդոլլահիանի մահվան լուրից հետո Իսրայելի տարբեր րաբբիներ հրապարակայնորեն արձագանքել են՝ խոսելով, այսպես կոչված, «աստվածային միջամտության» մասին:
Ինչպես նշում է jpost.com-ը, րաբբի Մեյր Աբութբուլը Ռաիսիին որակել է «Թեհրանի դահիճ» և դատապարտել նրան Իսրայելի և հրեա ժողովրդի նկատմամբ իր անտագոնիզմի համար:
«Ուստի Աստված ուղղաթիռի վթարի ժամանակ նրան և իր ողջ իսրայելատյաց անձնակազմը հանձնեց քամիներին», - գրել է Աբութբուլը՝ ենթադրելով, որ «վթարը աստվածային պատժի ձև էր»:
Նմանապես, րաբբի Նիր Բեն Արցին իրադարձությունը կապել է «աստվածային դժգոհության» հետ: Իր ֆեյսբուքյան գրառման մեջ Բեն Արցին զգուշացրել է. «Աստված ասաց, բավական է, դուք զայրացրել եք Նրան»: Րաբբիի կարծիքով՝ միջադեպը «հոգևոր հատուցման» հետևանք էր Ռաիսիի և նրա վարչակազմի գործողությունների համար։
Նրանց հետ համակարծիք է նաև րաբբի Յիցչակ Բացրին, որն իր մտքերով կիսվել է սոցիալական ցանցերում՝ Ռաիսիին «համեմատելով աստվածաշնչյան չարագործ Համանի հետ»:
Հիշեցնենք՝ Իրանի նախագահական ուղղաթիռը երեկ՝ մայիսի 19-ին, «կոշտ վայրէջք» է կատարել Իրանի Արևելյան Ադրբեջան նահանգում, ինչի հետևանքով ուղղաթիռի անձնակազմն ու բոլոր ուղևորները, այդ թվում երկրի նախագահ Էբրահիմ Ռաիսին ու ԱԳ նախարար Հոսեյն Ամիր Աբդոլլահիանը զոհվել են։
Իրանի կառավարությունը վստահեցրել է, որ նախագահ Էբրահիմ Ռաիսիի մահը նախարարների կաբինետի աշխատանքի խափանումների չի հանգեցնի։ Այս մասին ասվում է նախարարների կաբինետի թելեգրամյան ալիքում հրապարակված հայտարարության մեջ։
Իրանի նախագահի լիազորությունները, համաձայն երկրի Սահմանադրության, երկու ամսով կփոխանցվեն առաջին փոխնախագահ Մոհամմադ Մոխբերին։ Նա կստանձնի երկրի ղեկավարությունն առաջիկա երկու ամիսներին, իսկ 50 օրվա ընթացքում նոր նախագահական ընտրություններ կանցկացվեն։