120000 արցախցի կտրված է աշխարհից, 1100 քաղաքացի և 270 անչափահաս չի կարողանում վերադառնալ տուն, 13 երեխա վերակենդանացման բաժնում է, կա հումանիտար աղետի վտանգ․ ադրբեջանական գործողությունների քրոնիկան
Սույն թվականի դեկտեմբերի 12–ին՝ քաղաքացիական հագուստներով մի խումբ ադրբեջանցիներ իբր բնապահպաններ ու բնապահպանական նպատակով, փակել են Ստեփանակերտ-Գորիս մայրուղին, դա Արցախն Հայաստանին ու արտաքին աշխարհին կապող միակ ճանապարհն է։ Այդ ճանապարհը փակելու հետևանքով ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի տրանսպորտային կապը մայրաքաղաք Ստեփանակերտի հետ։
Նույն օրը Արցախի Հանրապետության արտաքին գործերի նախարարությունը ադրբեջանական կողմի քայլը որակեց սադրիչ գործողություն և Բաքվի ցեղասպան քաղաքականության հերթական դրսևորում։
Արցախի Ազգային ժողովը հայտարարեց, որ Արցախի խաղաղ բնակչության նկատմամբ ֆոսֆորային ռումբեր օգտագործած ադրբեջանցիները բնապահպանական պատրվակով արգելափակել են Ստեփանակերտ-Գորիս կյանքի ճանապարհը` նոյեմբերի 9(10)-ի եռակողմ համաձայնագրով միջանցքի կարգավիճակ ստացած մայրուղին:
Մեկ օր անց Արցախի խորհրդարանը բարձրաձայնել է Արցախի բնակչության հումանիտար աղետի սպառնալիքի մասին։
Բնապահպանական նպատակով քողարկված իր ծրագրերն իրականացող Ադրբեջանը ճանապարհը փակելու երկրորդ օրը դադարեցրել էր նաև գազամատակարարումը, որը որևէ առնչություն չունի անգամ իր շինծու նպատակի հետ։ Դա խոչընդոտ հանդիսացավ դպրոցականների և ուսանողների կրթության իրավունքն իրացնելուն․ Արցախի Հանրապետության կրթության, գիտության, մշակույթի և սպորտի նախարարությունը հայտնեց, որ Ադրբեջանի կողմից Արցախի Հանրապետությունը սնուցող միակ գազատարի աշխատանքը խափանելու պատճառով դեկտեմբերի 14-ից ժամանակավորապես կդադարեցվեն այն ուսումնական հաստատությունների պարապմունքները, որոնք ջեռուցվում են գազով։ Գազամատակարարումը վերականգնվեց միայն դեկտեմբերի 16–ին, դեկտեմբերի 19-ից վերսկսվեցին պարապմունքները բոլոր այն կրթական հաստատություններում, որտեղ ուսումնական գործընթացը դադարեցվել էր։
Ադրբեջանի կողմից Արցախը Հայաստանին և արտաքին աշխարհին կապող միակ ճանապարհը՝ Լաչինի միջանցքը արգելափակելու պատճառով 1100 քաղաքացիական անձինք, որից 270-ը անչափահաս, չեն կարողանում վերադառնալ իրենց տները:
Դեկտեմբերի 20–ի դրությամբ՝ Արցախը Հայաստանին կապող միակ ճանապարհը Ադրբեջանի կողմից արգելափակելու պատճառով ԱՀ առողջապահության նախարարության ենթակայության տակ գործող բուժհաստատություններում շարունակում են դադարեցված մնալ պլանային վիրահատությունները։
«Արևիկ» բուժմիավորումում 13 երեխա գտնվում է ռեանիմացիոն և նորածնային բաժանմունքներում: Նրանցից 4 ամսական փոքրիկի առողջական վիճակը, ում մոտ ախտորոշվել էր «Վիսցերալ լեյշմանիոզ», շարունակում է մնալ ծանր:
Միջազգային կառույցների հորդորիներին Ադրբեջանն ականջակուր չի եղել, Լաչինի միջանցքը շարունակում է փակ պահել, այդպիսով հումանիտար աղետի առաջ կանգնելու վտանգ ստեղծելով աշխարհից կտրված և 21–րդ դարում շրջափակման մեջ գտնվող 120000 քաղաքացու համար, կոպտորեն խախտելով մարդու իրավունքներն ու հիմնարար ազատությունները։ Արցախի արտաքին գերատեսչությունը շարունակում է դիմել միջազգային կառույցներին, որ ճնշեն անմարդկային քայլեր անող Ադրբեջանին և պաշտպանված լինեն Արցախցիների իրավունքները։