Քաղաքային կառավարման մոդելը խայտառակություն է, մի անձի ձեռքում է ամեն ինչ, քաղաքապետն ի՞նչ գործ ունի շինթույլտվությունների հետ․ Երվանդ Թարվերդյան․ Aravot.am
Ես բազմիցս քաղաքական ուժերին հորդորել եմ խոստումներ չտալ, թե այս կամ այն հարցը պետք է լուծել, պետք է լուծումների ճանապարհն էլ առաջարկել։
Այս մասին Aravot.am-ին տված հարցազրույցում ասել է «Միացյալ Հայաստան» կուսակցության նախագահ Երվանդ Թարվերդյանը, պատասխանելով իշխող ուժի խոստումների վերաբերյալ հարցին, որոնք տվել էին Երևանի ավագանու ընտրություններին ընդառաջ։
Դիտարկմանը, թե ինքը Երևանի ավագանու ընտրություններից առաջ խոստումներ չի՞ տալու, Երվանդ Թարվերդյանն ասաց․«Իհարկե ասելու եմ և առաջարկի հետ զուգահեռ մեր քաղաքական ուժի կողմից ասվելու է, թե ի՞նչը, ի՞նչ միջոցներով ու ի՞նչ ժամկետներում է արվելու։ Եվ ասվելու է, թե ինչ պատասխանատվություն կկրեն մարդիկ, ովքեր չեն կատարում իրենց խոստումները։ Իսկ ո՞վ է հիմա պատասխանատվութուն կրում՝ ոչ մեկ, թե ինչ անել՝ բոլորը կարող են ասել՝ գրքերից, տարբեր հեքիաթային քաղաքներ տեսնելուց, բայց երբ մի բան տեսնում ես, ոչ թե պետք է բերես և կրկնօրինակես այստեղ, այլ պետք է հասկանաս, թե արդյո՞ք հնարավոր է դա տեղայնացնել Երևանում»։
Երևան քաղաքի խնդիրների վերաբերյալ հարցին ի պատասխան Երվանդ Թարվերդյանն ասաց, որ պետք է փոխել կառավարման մոդելը․ «Խայտառակ իրավիճակ է, էլ փաստաթղթեր են կորում, տարիներով շինթույլտվություն են տալիս։ Կառավարման մոդելը խայտառակ մոդել է, մի անձի ձեռքում է ամեն ինչ, քաղաքապետն ի՞նչ գործ ունի շինթույլտվությունների հետ, ի՞նչ գործ ունի ամեն ինչի հետ, նրանք չեն պատկերացնում, թե ինչ է այդ պաշտոնի կարևոր հատկանիշը։ Օրինակ, այսօր ավտոբուսներ են ձեռք բերվում, որն իմ կարծիքով, ամսիներ առաջ քննարկվել է, բանակցություններ են վարվել, պայմանագրեր կնքվել, ավտոբուսը հասնում է, ներկայացնում են, թե իրենց օրոք է ձեռք բերվել ավտոբուսը»։
Անդրադառնալով քաղաքային տրանսպորտի խնդրին, որն իշխանությունը խոստացել էր լուծել 1–3 տարվա ընթացքում, Երվանդ Թարվերդյանն ասաց, որ այդ ամենը կանոնակարգելու կարիք ունի․ «Այս խայտառակ խցանումները վերացնելու համար գրագետ աշխատանք է պետք, ընդամենը հաշվարկներ, ստեղծել նոր տրանսպորտային հանգույց, քաղաքի կենտրոն ի՞նչ իրավունք ունի մուտք գործել այդքան ավտոմեքենա, որտե՞ղ են կայանատեղիները, կենտրոնում մի քանի հարկանի շենքեր են կառուցում ապօրինի, ու՞ր է քաղաքապետարանը, վերահսկող մարմինները, բայց քանդում են և հպարատանում, որ թե իրենք լավ են քանդում»։
Հարցին, թե խորհրդարանական ընտրությունները Թարվերդյանը կրկես էր անվանել և չէր մասնացկել, ինչո՞ւ է մասնակցելու Երևանի ընտրություններին, Երվանդ Թարվերդյանն ասաց, որ առջևում ժամանակ կա ուսումնասիրություններ անելու, գրանցումները նայելու՝ արդյո՞ք մի տան հասցեում տասնյակ մարդիկ են գրանցված, թե ոչ, ի հայտ են բերելու խախտումները, դիմելու են ԿԸՀ և խնդրելու են, որպեսզի ավելի խիստ վերաբերվի այդ հարցերին, իսկ խորհրդարանական ընտրությունների հետ զուգահեռներ տանելով՝ այն ժամանակ իրավիճակն այնպիսին էր, որ, ըստ Թարվերդյանի, ճիշտ չէր ընտրություն կազմակերպելը։
Երվանդ Թարվերդյանն ասաց, որ ինչ շանսերը պայմանավորված են իրենց աշխատանքներով, արդեն իսկ տարբեր մարդկանց թիմում ներգրավելով։
Հարցին, թե իրե՞նք էլ են խոստանալու Աջափնյակի մետրոյի կայարան կառուցել, Երվանդ Թարվերդյանն ասաց․ «Ասեմ ավելին, մեր քաղաքական ուժը տարբեր մոդելներ է ներկայացնելու, և ոչ միայն ստորգետնյա»։