Սեպտեմբերի 5-11-ը Դիլիջանում կանցկացվի «Buissup Global Forum 2022»-ը (լուսանկարներ, տեսանյութ)
Շուրջ 200 մասնակից, 20 խոսնակ, 30 մենթոր, շուրջ 50 ստարտափ և նոր ու բազմաթիվ գաղափարներ: Սեպտեմբերի 5-11-ը Դիլիջանում կանցկացվի «Buissup Global Forum»-ը՝ այս տարի «Գաղափարից դեպի իրագործում» խորագրի ներքո։ Անվճար բիզնես Ֆորումն իրականացվում է «Հայ գործարարների ասոցիացիա»-ի նախաձեռնությամբ և «Տաշիր» ընկերությունների խմբի աջակցությամբ:
Հայ գործարարների ասոցիացիայի գործադիր տնօրեն Գոհար Ղումաշյանը լրագրողների հետ զրույցում նշեց՝ հնարավորն անում են, որ հաջողակ հայ գործարարները համախմբվեն՝ ի նպաստ Հայաստանի տնտեսության ու ներդրումային հնարավորությունների զարգացման։
«Ֆորումին մասնակցող թիմերն աշխատում են մենթորների հետ: 7 օրվա ընթացքում մենթորները կատարելագործում են նրանց ներկայացրած ծրագրերը: Գրեթե ամեն ժամ աշխատում են ծրագրերի ղեկավարների, թիմերի հետ և փորձում են հնարավորինս անել, որ վերջին օրն այդ ծրագրերը գրագետ ներկայացվեն ժյուրիի անդամներին և արդեն ներկայանան Armenian Business Forum-ի շրջանակում»,-նշեց Գ. Ղումաշյանը:
«Buissup Global Forum»-ի հիմնական մենթոր Նարեկ Ալեքսանյանի խոսքով՝ ֆորումը Հայաստանի համար աննախադեպ է.
«Հայաստանում վերջապես փորձ է արվում ստեղծել գործարար միջավայր, մանավանդ երիտասարդության շրջանակում, որտեղ գործարարությունը տարածում չունի, սերմանվում է սերը դեպի գործարարություն, բացի դա՝ այդ գործարարները դառնում են ավելի հաճախորդամետ»:
Երիտասարդ գործարարության զարգացմանը նպաստող «Buissup» ծրագիրը սկիզբ է առել 2021 թվականին։ Նախորդ տարի ֆորումն ունեցել է 9 հաղթող. պորտֆելը՝ մոտ 1,5 միլիոն դոլար։ Ֆորումի հաղթողներից «Text`nPayme » նախագծի համահիմնադիր Արթուր Կարապետյանը նշում է՝ իրենց թիմի համար «Buissup Global Forum»-ը եղել է բեկումնային՝ նշելով, որ կես տարվա ընթացքում կարողացել են ունենալ գրասենյակ, ընդլայնել թիմը, և ձեռք բերել ավելի շատ գործընկերների:
«Qayltech»-ընկերությունը ևս «Buissup Global Forum»-ի հաղթողներից է: Ընկերության տնօրեն Լիլիթ Գուրօղլյանը նշում է, որ ֆորումի շնորհիվ կարողացան ոչ միայն ընդլայնել իրենց թիմը, այլև նորարարական պրոդուկներ ներկայացնել միջազգային շուկաներ։
««Buissup Global Forum»-ն ու «Հայ գործարարների ասոցացիա»-ն մարդուն վերափոխում են բիզնեսմենի»,– ասում է ֆորումի հաղթողներից Medu.am-ի համահիմնադիր Գևորգ Գրիգորյանը։ Նրա խոսքով՝ ֆորումին մասնակցելով՝ Medu.am-ը սոցիալական պրոյեկտից դարձել է աշխատող բիզնես։
Նշենք, որ «Buissup Global Forum 2022»-ի հաղթողները հայտնի կլինեն սեպտեմբերի 10-ին: