Թուրքիան և Ռուսաստանը պայմանավորվել են անցնել ռուբլով առևտրի
Թուրքիայի նախագահ Ռեջեփ Թայիփ Էրդողանը հայտարարել է, որ օգոստոսի 5-ին Սոչիում Վլադիմիր Պուտինի հետ հանդիպմանը պայմանավորվածություն է ձեռք բերվել ռուբլով երկկողմ առևտրին անցնելու վերաբերյալ: ՏԱՍՍ գործակալության հաղորդմամբ՝ այս մասին հայտնում է TRT հեռուստաալիքը։
«Քանի որ մենք մեր առևտուրն անելու ենք ռուբլով, սա, իհարկե, լուրջ եկամտի աղբյուր կդառնա Թուրքիայի և Ռուսաստանի համար։ Բացի այդ, կա «ՄԻՐ» քարտը: Ներկայումս այն ընդունվում է մեր հինգ բանկերի կողմից: Այս հարցում շատ լուրջ առաջխաղացումներ կան, որոնք, ի վերջո, կբարելավեն Ռուսաստանից ժամանած զբոսաշրջիկների կեցության պայմանները։ Նրանք կկարողանան գնումներ կատարել, վճարել հյուրանոցների համար։ Այցի ընթացքում բանակցություններ են վարել մեր երկրների կենտրոնական բանկերի ղեկավարները»,- ասել է Էրդողանը՝ չհստակեցնելով հանդիպման օրակարգը։
Էրդողանն ասել է, որ Թուրքիան և Ռուսաստանը հաստատել են երկկողմ առևտուրը տարեկան մինչև 100 միլիարդ դոլարի հասցնելու ծրագրերը:
«Մենք վերահաստատեցինք մեր նպատակը՝ երկու երկրների միջև առևտուրը հասցնել 100 միլիարդ դոլարի։ Դրան հասնելու համար մենք ցանկանում ենք զարգացնել համագործակցությունը բոլոր ոլորտներում՝ ներառյալ էներգետիկան, առևտուրը, զբոսաշրջությունը, գյուղատնտեսությունը։ Մենք ցանկանում ենք, որ մեր առևտուրն ավելի հավասարակշռված լինի»,- ասել է Էրդողանը։