Որոշում կայացնողներն ուզում են ամբողջ մեղքը գցել քաղաքացիների վրա, այս կեցվածքը ձեռքերը լվանալու վկայությունն է․ Վարդան Բոստանջյանը՝ սահմանափակումները թուլացնելու մասին
Ամենայն հավանականությամբ, որոշում կայացնողները, ես անգամ կաշկանդվում եմ նրանց կառավարողներ ասել, ուզում են ամբողջ մեղքը գցել մարդկանց վրա։ Այս մասին Tert.am-ի հետ զրույցում ասաց տնտեսագետ, նախկին պատգամավոր Վարդան Բոստանջյանը՝ անդրադառնալով կորոնավիրուսով պայմանավորված սահմանափակումների թուլացմանը։
«Այո, մարդիկ էլ իրենց հերթին պետք է զգուշավորություն ցուցաբերեն, իրենց վարքագծին հետևեն, բայց չեմ կարծում, որ կատարվում են բոլոր անհրաժեշտ քայլերը համավարակին դիմակայելու համար։ Կառավարության բոլոր քայլերը, որոնք կատարվում են դիմակայելու համար համավարակին, ակնհայտորեն արդյունավետ չեն։ Հիմա էլ պետությունը կարելի է ասել ձեռքերը լվանում է, այս կեցվածքը (սահմանափակումների թուլացումը – Tert.am) դրա մասին է խոսում»,- նշեց Վարդան Բոստանջյանը։
Հիշեցնենք, որ մայիսի 4-ից սկսած՝ տեղարշարժի թերթիկի անհրաժեշտություն այլևս չկա, հանվել են նաև տնտեսական գործունեության գրեթե բոլոր տեսակների վերաբերյալ սահմանափակումները: Մայիսի 4-ից գործում են բացօթյա ռեստորանները, սրճարանները: Անհատական ծառայությունները, որոնց խմբում են լվացման, մաքրման և չոր մաքրման ծառայությունները, վարսավիրանոցները և գեղեցկության սրահների գործունեությունը նույնպես թույլատրված են:
Վարդան Բոստանջյանի խոսքով՝ Կառավարության համար առաջնահերթ պետք է լիներ մարդկանց կյանքի, առողջության հարցը։ Տնտեսական գործունեությունը, մնացած այլ՝ թեկուզ կարևոր խնդիրները, ըստ նրա՝ ածանցյալ են։
«Առաջին հերթին բոլոր քայլերը պետք է ուղղված լինեին մարդկանց հավարակից հեռու պահելուն, նրանց առողջության համար առավելագույնս աշխատելուն։ Ինչ վերաբերում է տնտեսությանը, այո, առանց տնտեսության էլ հնարավոր չէ գոյատևել։ Այս երկուսն իրար հետ փոխկապակցված են, բայց հենց կառավարման ամբողջ հմտությունը, վարպետությունը նրանում է, որ կարողանան այս ամենում գտնել ճիշտ հարաբերակցություն»,- ասաց տնտեսագետը։
Հայաստանում մայիսի 5-ի դրությամբ հաստատվել է կորոնավիրուսով վարակման 112 նոր դեպք: Մահացել է մեկ քաղաքացի, ընդհանուր մահերի թիվը 40 է։ Վերջին մի քանի օրերին ՀՀ-ում 24-ժամյա կտրվածքով կորոնավիրուսի դեպքերը եռանիշ են։ Վարակվածների ընդհանուր թիվը 2619 է, իսկ նախօրեին առողջապահության նախարար Արսեն Թորոսյանը հայտարարել էր, որ մինչև մայիսի վերջ հնարավոր է 10 հազար վարակակիր լինի։ Եթե կանոնները չպահպանվեն, նախարարի խոսքով՝ թվերն ավելի կաճեն՝ մինչև 500 հազար։
«Մոտ մեկ ամիս առաջ Առողջապահության համաշխարհային կազմակերպությունը գնահատում էր ՀՀ-ի համար 500 հազար դեպք, տասնյակ հազարավոր հոսպիտալիզացիաներ և հազարավոր մահեր։ Հիմա ասել՝ 500 հազար կլինի, 100 հազար, թե հիսուն հազար, դժվար է, բայց մեր վարքագիծն է պայմանավորելու էդ թիվը»,- ասել էր Արսեն Թորոսյանը։
Վարդան Բոստանջյանը զարմանալի է համարում նախարարի կողմից ԱՀԿ-ին հղում անելու փաստը․ «Այսինքն՝ գեոկառավարողների կողմից կազմակերպված էր, դա էլ ՀՀ բաժի՞նն էր։ Հիմա նրան էլ ասել են, որ վերաարտադրի այդ ամենը։ Դավադրությունների տեսություն ենք ասում, բայց ինչ-որ տեղ ուզում ես հավատալ դրան»,- նշեց նա։