Հանրային սննդի ոլորտի 200-ից ավելի ներկայացուցիչ ստորագրեց հռչակագիր
Ճգնաժամի ընթացքում հանրային սննդի ոլորտի ամենամեծ խնդիրը ֆինանսական հոսքերի կրճատումն է, իսկ տարածքի վարձը ռեստորանի համար ծախսատար է: Տարածքի սեփականատիրոջ և վարձակալի միջև փոխզիջումն այսօր գործող բիզնեսի համար առաջին օգնությունն է․ խնդիր, որի լուծման համար ռեստորատորները միավորվել են:
Համաճարակային իրավիճակի հետևանքները դարձան հռչակագրի ստեղծման հիմք: Հայաստանի հանրային սննդի ոլորտի կազմակերպությունները, կարևոր համարելով տարիներ շարունակ ոլորտում բիզնեսների շարունակականությունը, այսօր ստորագրեցին հռչակագիր՝ միավորելով մեկ գաղափարի շուրջ, այն է՝ պահել ազնիվ մրցակցության կանոնները, միմյանց օգնելով՝ դուրս գալ ճգնաժամից:
Ռեստորատորների միության գործադիր տնօրեն Վահե Գևորգյանի խոսքով՝ հռչակագրի միտքն առաջացավ վարձակալի և տարածքի սեփականատիրոջ միջև համաճարակի ընթացքում առաջացած կոնֆլիկտից, որն առաջացել էր փոխզիջման չգնալու հետևանքով։
«Հռչակագրի գաղափարը մեկն է՝ պաշտպանել ոլորտի շահերը՝ հարգելով մրցակցության կանոները: Հռչակագրում սահմանվում են մինիմալ կանոններ, որոնք պետք է պահպանել: Պանդեմիայի ժամանակ պետք չէ անազնիվ կերպով օգտվել մրցակից կազմակերպության դժվար վիճակից: Արդարության համար հորդորում ենք չվարել ագրեսիվ քաղաքականություն, չփորձել տարածք խլել: Ռեստորաններին հռչակագիրը կտա ժամանակ վերականգման համար, որպեսզի հնարավոր լինի վերակազմակերպել ֆինանսական հոսքերը և գոյատևել ճգնաժամի ընթացքում՝ ունենալով զարգացման հետագա նախադրյալներ»,- ասաց Վահե Գևորգյանը:
Հռչակագիրը ստորագրել են ռեստորատորների Հայկական միության բոլոր խոշոր անդամները՝ Margaryan Business Group-ը, «Երեմյան Փրոջեքթս»-ը, Asador-ը, Wine Republic-ը, Սալոն, Կլոդ Մոնե, Շառլ ռեստորանները, Սեգաֆրեդոն, Քոֆիշոփը, Կարասը, Գենացվալե ցանցերը և այլ կազմակերպություններ:
Հռչակագիրն ունի երկու հիմնական կետ: Առաջինում առաջարկվում է մեկ տարով վերանայել վարձակալության պայմանագիրը, սահմանել զեղչ մինչև 50 տոկոս՝ տարածքը վարձով տվող անհատի կողմից՝ այդ կերպ բիզնեսին հնարավորություն տալով գոյատևել:
Ըստ Ռեստորատորների միության գործադիր տնօրենի՝ մեկ տարի հետո միայն հանրային սննդի կազմակերպությունները կկարողանան վերականգնել նախկին եկամտի գոնե 60 տոկոսը: Մյուս կետում նշվում է, որ գործընկերները 18 ամիս չեն քննարկի և դիտարկի ոլորտի այլ ներկայացուցիչների կողմից զբաղեցրած կամ արդեն ազատված տարածքների վարձակալության վերաբերյալ որևէ առաջարկ, չեն կնքի պայմանագրեր և չեն զբաղեցնի միմյանց կողմից ազատվող վարձակալվող տարածքները։ Հռչակագիրը պաշտպանում է ոլորտի ձեռնարկությունների շահերը, սահմանում գործարար պարկեշտության նոր չափանիշներ՝ նպաստելով հետճգնաժամային իրավիճակում արագ վերականգնմանը:
Margaryan Business Group-ի PR մենեջեր Աննա Սալոմեն նշում է՝ տարածքների սեփականատերերի հետ ճգնաժամի առաջին օրվանից հաջողվել է գալ ընդհանուր հայտարարի:
«Վարձերը չեղյալ են համարվել կամ կրճատվել են: Այդուամենայնիվ ստեղծված վիճակում որոշներն ունեն խնդիրներ:Հռչակագիրը կօգնի խուսափել իրավիճակից, երբ, օրինակ, 50 տոկոսից ավելի վճարել չկարողացող ռեստորանի տարածքի սեփականատերը տարածքն առաջարկի մեկ այլ ռեստորատորի, նա էլ համաձայնի»,- ասաց Աննա Սալոմեն:
Հանրային սննդի ոլորտի ձեռնարկությունները պայմանավորվել են միմյանց տեղեկացնել իրենց վարձակալական պայմանագրերի խզման մասին, եթե սեփականատերը հրաժարվում է վերանայել պայմանագիրը: Աննա Սալոմեն նշում է՝ փոխզիջումը տարիների փոխշահավետ գործակցությունը պահպանելու լավագույն տարբերակն է:
Նախաձեռնությանը կարելի է միանալ ՝ չլինելով Հայաստանի Ռեստորատորների միության անդամ: Հռչակագիրը նպատակ ունի ընդգծել հանրային սննդի ոլորտի ձեռնարկությունների համերաշխությունը՝ ընդհանուր խնդիրները լուծելիս։ Բիզնեսի գործունեությունը մայիսի 4-ից մասամբ դարձել է թույլատրելի. բացվել են մայրաքաղաքի բացօթյա սրճարանները: Օրինակ Margaryan Business Group-ի բոլոր ռեստորաններից երեկ բացվել են Tsirani Garden և Chinar ռեստորանների բացօթյա հատվածները, իսկ այսօր՝ Alaska, Vostan և Hans & Franz ռեստորանների բացօթյա հատվածները:
Լրագրող՝ Լուսինե Զարայելյան