Չինաստանը կոչ է արել Վենեսուելայի նկատմամբ պատժամիջոցներով կամ ռազմական միջամտությամբ չվերածնել «ջունգլիների օրենքը»
Չինաստանը կոչ է արել աշխարհի երկրներին չմիջամտել Վենեսուելայի ներքին գործերին՝ կրկնելով անցյալի սխալները: Ըստ Չինաստանի ԱԳ նախարար Վան Իի՝ ռազմական միջամտությունն ու պատժամիջոցները միայն վերածնում են «ջունգլիների օրենքը», փոխանցում է «ՌԻԱ Նովոստի» գործակալությունը:
«Պատմությունը մեզ շատ նման դասեր է տվել, պետք չէ կրկնել նախկին սխալները: Մենք կարծում ենք, որ յուրաքանչյուր երկրի ինքնիշխանությունն ու անկախությունը կարևոր է, դրանք անհրաժեշտ է գնահատել ու պահպանել»,- ասել է Չինաստանի ԱԳՆ ղեկավարը՝ հույս հայտնելով, որ Վենեսուելայի իշանություններին ու ժողովրդին կհաջողվի երկխոսության միջոցով քաղաքական կարգավորման հասնել, երկրում կայունություն հաստատել:
Ըստ նրա՝ ցանկացած ներքին հարց պետք է լուծվի տվյալ երկրի ժողովրդի կողմից:
Հիշեցնենք, որ Վենեսուելայում հունվարի 21-ին զանգվածային ցույցեր են սկսվել գործող նախագահ Նիկոլաս Մադուրոյի դեմ: Անկարգությունների ֆոնին ընդդիմության առաջնորդ Խուան Գուաիդոն իրեն երկրի ժամանակավոր նախագահ է հռչակել: ԱՄՆ-ի գլխավորությամբ մի շարք արևմտյան ու լատինամերիկյան երկրներ ճանաչել են նրա իշխանությունը: Ռուսաստանը, Չինաստանը, Թուրքիան, ևս մի քանի երկիր Վենեսուելայի նախագահ է ճանաչում Նիկոլաս Մադուրոյին: