ՀՀ-ն բանակցային նորմալ մթնոլորտ ստեղծելու համար 1-ին քայլն արել է՝ հուսալով, որ նման հայտարարություն կհնչի նաև Ադրբեջանի կողմից․ Ն. Փաշինյան
ԱԺ-կառավարություն հարցուպատասխանի ժամանակ «Իմ քայլը» խմբակցության պատգամավոր Տաթև Հայրապետյանը հարցրեց վարչապետ Նիկոլ Փաշինյանին, թե ինչպիսին է նրա դիրքորոշումն այն հարցի առնչությամբ, որ Բաքուն փորձում է միջազգային հանրությանը ներկայացնել, որ Հայաստանի Կառավարությունը խնդիրներ է ստեղծում Արցախի հարցի բանակցային գործընթացում՝ կոշտացնելով իր դիրքորոշումը։
Նիկոլ Փաշինյանը պատասխանեց, որ կան գնահատականներ, որ Ղարաբաղի հարցի բանակցային գործընթացում Հայաստանը կոշտացրել է դիրքորոշումը. «Բայց ես կարող եմ ասել, որ Հայաստանի, մեր Կառավարության դիրքորոշումն այս ընթացքում չի փոխվել»,-նշեց նա։ Փաշինյանը նշեց, որ ի սկզբանե ասել են, որ լինելու են իրավիճակին համարժեք.
«Դեռևս նախորդ գումարման Ազգային ժողովում այս ամբիոնից ես հայտարարություն արեցի այդ մասին, Արցախի հարցի ցանկացած լուծում պետք է ընդունելի լինի Արցախի, Հայաստանի և Ադրբեջանի ժողովրդի համար։ Այս հայտարարությունն այնքան էլ հեշտ չէր, բայց սա արվել է բանակցային նորմալ մթնոլորտ ստեղծելու համար, և Հայաստանն, ըստ էության, արել է առաջին քայլը այս ճանապարհին՝ հույս ունենալով, որ համանման հայտարարություն կհնչի նաև Ադրբեջանի կողմից։
Բայց, ցավոք սրտի, մինչև այժմ ադրբեջանական կողմից համանման հայտարարություններ չեն հնչում, և ընդհակառակը ակնարկներ են արվում ուժով կամ ռազմական ճանապարհով հարցերը լուծելու հնարավորության մասին»։
Վարչապետի խոսքով՝ Ադրբեջանի այս հայտարարությունները ակնհայտ են դարձնում, որ երկրի իշխանությունները չեն էլ մտածում, որ հարցի կարգավորման որևէ տարբերակ պետք է ընդունելի լինի նաև Արցախի և Հայաստանի ժողովրդի համար․ «Մենք այս իրավիճակում ընդամենը հավատարիմ ենք լինում մեր դիրքորոշմանը՝ մնալ ադեկվատ իրավիճակին։ Սա է մեր դիրքորոշումը։ Մենք շատ կարևոր ենք համարում արձանագրել, որ բանակցությունները արդյունավետ դարձնելու համար պետք է լինի արդյունավետ ֆորմատ, որը ճանաչվել է 1994 թվականին, երբ ԼՂՀ-ն դարձել է լիարժեք բանակցային կողմ։ Մենք ջանքեր ենք գործադրում, որ այդ արձանագրված ֆորմատը լիարժեք գործի ԵԱՀԿ Մինսկի խմբի շրջանակում»։
Անդրադառնալով պատգամավորի այն հարցին, թե, արդյոք, մեր Կառավարության դիրքորոշումները հասկանալի և ընկալելի են Հայաստանի միջազգային գործընկերների համար, Փաշինյանն ասաց․ «Մենք, բնականաբար, մեր գործընկերների հետ աշխատում ենք, որ մեր դիրքորոշումներն ավելի ու ավելի հասկանալի դառնան, և իմ տպավորությամբ՝ ընկալման մակարդակը մեծանում է»։