Նոր կառավարությունը հստակ քայլեր չի ձեռնարկել՝ ուղղված Ադրբեջանին բանակցությունների սեղան բերելուն և նրան այնտեղ քաղաքական լուծում պարտադրելուն. քաղաքագետ
Արցախի հիմնախնդրի կարգավորման հետ կապված գլխավոր մտահոգությունս այն է, որ թույլ չտանք իրավիճակի փոփոխություն բանակցությունների սեղանին: Այս մասին Tert.am-ի հետ զրույցում ասաց քաղաքագետ Հրանտ Մելիք-Շահնազարյանը:
«Վերջին տարիներին Ադրբեջանն իսկապես հայտնվել էր բավականին ճնշված դրության մեջ, և նրա շանտաժի քաղաքականությունն անհասկանալի և անընդունելի էր բոլորի՝ միջնորդների, հայկական կողմի համար: Ադրբեջանում հասկացել էին, որ ամեն անգամ նոր շանտաժի գնալուց հայկական կողմն արդեն բացահայտ խստացնում է իր դիրքորոշումը և դրանից սկսել էին խուսափել:
Մտավախությունը նրա հետ է կապված, որ ձեռքբերված հաջողությունները պետք է մշտապես զարգացնել, հակառակ պարագայում քաղաքական իրավիճակը փոխվում է: Այսինքն՝ եթե հիմա կա հնարավորություն՝ խստացնելու մեր բանակցային դիրքորոշումը, դա պետք է անպայման արվի, իսկ մենք հիմա դրա ականատեսը չենք լինում»,- նշեց քաղաքագետը:
Հրանտ Մելիք-Շահնազարյանի խոսքով՝ 2013 թ.-ից սկսած հայկական կողմի դիրքորոշումը հետզհետե բարելավվել, ամրապնդվել է, ավելի հասկանալի է դարձել միջնորդների և միջազգային հանրության համար: Ըստ նրա՝ միջնորդների հայտարարությունները մշտապես ձևավորվել են այն մոտեցումների շրջանակներում, որոնք որդեգրել էր պաշտոնական Երևանը:
«Բանակցային գործընթաց, որպես այդպիսին, շարունակականության առումով, ըստ էության, դադարեցվել է 2013 թ.-ի վերջերից: Դրանից հետո Ադրբեջանը հետևողականորեն սահմանում իրավիճակը սրելու միջոցով իր դիրքերն ամրապնդելու մարտավարությամբ է առաջնորդվել: Այսինքն՝ փորձել են ոչ թե խնդիրը լուծել բանակցությունների սեղանի շուրջ, այլ ռազմի դաշտում, և անընդհատ տապալվել են այդտեղ: Եվ շարունակաբար տապալվելով՝ Ադրբեջանը հասկացել է, որ կորցրել է միջազգային հանրության քաղաքական աջակցությունը»,- նշեց նա:
Քաղաքագետի կարծիքով՝ նոր կառավարությունը դեռ հստակ քայլեր չի ձեռնարկել, որոնք ուղղված կլինեն Ադրբեջանին բանակցությունների սեղան բերելուն և նրան այնտեղ քաղաքական լուծում պարտադրելուն. «Ես դա չեմ տեսել ո՛չ Մինսկի խմբի համանախագահող երկրների հետ զրույցներում, ո՛չ այլ միջազգային հանդիպումներում: Անգամ Մերկելի տարածաշրջանային այցի ընթացքում հայկական կողմը հրապարակային դրա մասին չխոսեց»,- նկատեց նա:
Ինչ վերաբերում է վարչապետ Նիկոլ Փաշինյանի՝ Արցախին բանակցությունների սեղան վերադարձնելու հայտարարությանը, Հրանտ Մելիք-Շահնազարյանը նշեց, որ դա միանշանակ նորություն չէր: Նրա խոսքով՝ Արցախին բանակցային սեղան վերադարձնելու հարցը մշտապես դրված է եղել ՀՀ դիվանագիտության առջև:
«Արցախի բանակցությունների սեղանին վերադարձի հարցը մշտապես եղել է Հայաստանի բանակցությունների սեղանին: Ըստ էության, Հայաստանի և Ադրբեջանի ղեկավարները բանակցել են ոչ թե հակամարտության կարգավորման, այլ այն սկզբունքների մասին, որոնք պետք է ընկած լինեն այս հակամարտության կարգավորման հիմքում: Իսկ այդ սկզբունքներից մեկը հենց Արցախի մասնակցությունն էր»,- հայտնեց քաղաքագետը:
Նրա կարծիքով՝ նախ պետք է հասունացնել բանակցություններն սկսելու փուլը և հետագայում խոսել բանակցությունների հիմքում ընկած սկզբունքներից մեկի՝ Արցախին բանակցային սեղան վերադարձնելու մասին:
«Նիկոլ Փաշինյանը. երևի թե. այդ հայտարարությամբ փորձում է ավելի տեմպ տալ գործընթացին, ավելի շուտ հասնել նրան, որպեսզի բանակցային գործընթաց սկսվի: Բայց ամբողջ խնդիրն այն է, որ բանակցային գործընթացին խոչընդոտող հիմնական հանգամանքն այն չէ, որ Ադրբեջանը չի ուզում Արցախի հետ բանակցել, այլ այն է, որ Ադրբեջանն ընդհանրապես խուսափում է քաղաքական լուծումներից: Այն, ինչը հայտարարում է Ն. Փաշինյանը, շատ կարևոր է, և Արցախը պետք է լինի բանակցային սեղանի շուրջ, բայց հիմնականում առկա խնդիրը դա չէ այսօր Ադրբեջանի և հայկական երկու պետությունների հարաբերություններում»,- ասաց Հրանտ Մելիք-Շահնազարյանը: