Նախկինում, երբ մեզ քննադատում էին, կամ իրավիճակին չէին տիրապետում կամ քաղաքական մանիպուլյացիա էր. Վ. Բաղդասարյան
ԱԺ-ում մինչև 40 մլն խորանարդ մետր հավելյալ ջուր բաց թողնելու նախագծի քննարկմանը Հանրապետական խմբակցության ղեկավար Վահրամ Բաղդասարյանը հայտարարեց, որ Սևանա լիճը միշտ էլ եղել է իրենց ուշադրության կենտրոնում:
«Ամիսներ առաջ, երբ վարչապետ էինք ընտրում, երբ որ հաստատում էինք ծրագիր, այս ամբիոնից ես մի քանի մտահոգություններ հայտնեցի, որ երբ նոր կառավարությունը կզգա կառավարման ծանրությունը, նա կգիտակցի, որ շատ դեպքերում հանիրավի քննադատության է ենթարկել նախորդ կառավարությանն ու անդամներին»,-ասաց նա:
Վահրամ Բաղդասարյանը հիշեցրեց, թե կոնկրետ Սևանից հավելյալ ջուր բաց թողելու համար ինչպիսի քննադատություններ, որակումներ և գնահատականներ էին լինում: «Դա թվում է, երկու փաստով կարելի է արձանագրել, որ կամ իրավիճակին չէին տիրապետում, կամ քաղաքական մանիպուլյացիա էր»,-ասաց նա:
Բացի այդ ըստ Բաղդասարյանի, նախագիծը բերվել է երկու ամիս ուշացումով: «Կարող ենք հարգանքով վերաբերվել, գուցե Կառավարությունը նոր էր և իրավիճակին չէր տիրապետում: Դեռ մայիս, հունիս ամիսներին ասում էինք, որ այս օրենքն անխուսափելի է և պետք է բերվի ԱԺ, իսկ մինչ այդ պետք է լիներ լուրջ մասնագիտական քննարկում, բայց հորդորները, կարծես, քիչ տեղ հասան, և հիմա հապշտապ բերել են և քննարկում ենք»,-ասաց նա:
Վահրամ Բաղդասարյանը մի քանի մեջբերում հիշեց նախկին քննադատական ելույթներից. «Սա արվում էր օլիգարխների համար՝ պոմիդոր ջրելու համար, հետևաբար դեմ ենք քվեարկելու»:
Բաղդասարյանը նշեց, որ այսօր, իրոք, գյուղացուն անհրաժեշտ է ջուր. «Բայց հարց է առաջանում, որ գյուղացին երկու ամիս վնասներ է կրել, ինչպե՞ս պետք է այդ հարցերը լուծվեն, կամ պե՞տք է զիջվեն վարձերը, կամ էլ լրացուցիչ ջուր բաց թողնված ջրից ստացված էներգետիկ շահույթների հաշվին սուբսիդավորեն, քանի որ մեր պատճառով է, որ գյուղացին երկու ամիս մնացել է առանց ջրի»,-ասաց նա:
Ի դեպ, Վահրամ Բաղդասարյանը նշեց, որ լավ կլինի, որ Կառավարության ներկայացուցիչներն ավելի պատրաստված լինեն: «Այս ամբիոնի մոտ բարձրացողը պետք է լինի պատրաստված, առավել ևս, որ գալիս են պատգամավորների մոտ, հստակ և բովանդակալից լինեն»,-ասաց նա:
Վահրամ Բաղդասարյանը հայտարարեց, որ կողմ են քվեարկելու նախագծին՝ հաշվի առնելով, որ գյուղացուն չի կարելի թողնել առանց ջրի: