Բաբլոյան-Փաշինյան հանդիպումը ցույց տվեց, որ ԱԺ-ն կառավարության կցորդը չէ. Էդուարդ Շարմազանով
Արա Բաբլոյանը ոչ թե հայտարարել է, որ ընտրությունները լինեն 1 տարուց, այլ հղում է արել Կառավարության ծրագրին: Այսօր ԱԺ-ում լրագրողների հետ զրույցում նման տեսակետ հայտնեց ԱԺ փոխնախագահ, ՀՀԿ խոսնակ Էդուարդ Շարմազանովը: Միևնույն ժամանակ նա նկատեց, թե ինչ կլինի 6 տարի հետո կամ 1 տարի հետո, որևէ մեկն ասել չի կարող:
«ՀՀԿ-ն այս ուղղությամբ որևէ քննարկում չի արել, պառլամենտը կպաշտոնավորի մինչև 2022 թ.-ն, թե կլինեն արտահերթ ընտրություններ, դա կապված է քաղաքական ուժերի բանակցություններից, ներքաղաքական ու արտաքին քաղաքական մարտահրավերներից, սակայն այսօր ես պատրաստ չեմ այդ հարցին վերջնական պատասխան տալ»,- ասաց նա:
Շարմազանովի համար Բաբլոյան-Փաշինյան հանդիպումն ավելի կարևոր էր, ոչ թե ընտրությունների մասին խոսակցությամբ, այլ նրանով, որ ի ցույց դրվեց, որ ԱԺ-ն վարչապետ Նիկոլ Փաշինյանի կառավարության կցորդը չէ, այլ Օրենսդիր մարմինն առանձին իշխանության ճյուղ է:
«Որևէ մեկն իրավունք չունի և թույլ չենք տա, որ պատգամավորների ու ԱԺ-ի վրա մատ թափ տան, և փորձեն իրենց սեփական օրակարգը սպառնալիքներով ու շանտաժով անցկացնել: Մենք պատրաստ ենք երկխոսության, քաղաքականությունն ինքը երկխոսության արդյունք և ցանկացած հարցի շուրջ մենք պատրաստ ենք քննարկում իրականացնել մեր կառավարության հարգելի գործընկերների հետ: Մենք պատրաստ ենք բանակցել, բայց ոչ ընդունել նրանց գերակայությունը»,- ընդգծեց Էդուարդ Շարմազանովը:
ԱԺ փոխխոսնակը գտնում է, որ ժողովրդավարությունը նախևառաջ իշխանությունների տարանջատման սկզբունքն է:
Մանրամասները՝ տեսանյութում: