Երևանի ավագանու ընտրություններին «Լույս» դաշինքով մասնակցելը ՔՊ-ի հետ անհամաձայնության արդյունք չէ. Է. Մարուքյան (տեսանյութ)
«Լուսավոր Հայաստան» կուսակցության նախագահ Էդմոն Մարուքյանը վստահեցնում է՝ Երևանի ավագանու ընտրություններին «Ելք» դաշինքով չմասնակցելը հակասությունների ու անհամաձայնության արդյունք չէ: Նա այսօր ԱԺ-ում լրագրողների հետ զրույցում ասաց, որ «Քաղաքացիական պայմանագիր» կուսակցության հետ չեն քննարկել անգամ միասին մասնակցելու հարցը:
««Լուսավոր Հայաստան»-ն ու «Հանրապետություն»-ն ընտրությանը կմասնակցեն «Լույս» դաշինքով, սակայն սա հակասությունների արդյունք չէ: Հարցը չի հասել նրան, որ նույնիսկ չհամաձայնենք, մեր գործընկերները որոշել են մասնակցել մի ուժով, իսկ մենք որոշել ենք մասնակցել երկու ուժով: Այստեղ որևէ հարց չկար չհամաձայնելու»,- ասաց նա:
Մարուքյանը նշեց, որ ՔՊ-ի հետ իրենք բնական դաշնակիցներ են, ինչն, ըստ նրա, բոլորի համար ակնհայտ է: Նա կարծում է, որ իրենց և ՔՊ ապագա համագործակցության դուռը բաց է: Ինչ վերաբերում է արտահերթ խորհրդարանական ընտրություններին մասնակցության ձևաչափին, Մարուքյանը նշեց, որ արտահերթ խորհրդարանական ընտրությունների ո՛չ օրը, ո՛չ ժամկետները հայտնի չեն:
«Կգա այդ օրն, ու ադ ժամանակվա հետ կապված որոշում կկայացնենք»,- շարունակեց Մարուքյանը:
ԱԺ «Ելք» խմբակցության պատգամավորը համակարծիք չէ այն դիտարկմանը, թե «Ելք» դաշինքն այլևս գոյություն չունի: Էդմոն Մարուքյանը հիշեցրեց՝ կա խմբակցություն և հուշագիր:
«Երբ մի օր ես, Նիկոլն ու Արամը կհավաքվենք ու կհայտարարենք, որ «Ելք» դաշինքն այլևս չկա, հուշագիրն այլևս չի գործում, այն ժամանակ կասեք, որ «Ելք»-ը չկա, իսկ մինչ այս օրը խնդրում եմ այդ հարցը չտալ»,- շեշտեց Մարուքյանը:
Հարցին՝ ինչ ակնկալիքներ ունեն ընտրություններից՝ հաշվի առնելով, որ այսօր վարչապետ Նիկոլ Փաշինյանի հեղինակությունը մեծ է, իսկ նրանք առանձին են ներկայանում, Էդմոն Մարուքյանը պատասխանեց. «Բոլոր թեկնածուները շատ հարգարժան մարդիկ են, եթե չեմ սխալվում՝ 11 ուժ հայտարարել է մասնակցության մասին, լուրջ մրցակիցներ են: Միևնույն ժամանակ կարծում եմ, որ Արտակ Զեյնալյանը և թիմը, որ կա, հզոր է: Մենք լավ շանսեր ունենք, վերջին 15-20 տարիների ընթացում առաջին անգամ լինելու են արդար ու հավասար ընտրություններ: Երևանի բնակիչները կորոշեն, թե ով է Երևանի քաղաքապետը, հարցումներ էլ չունենք, որ ասեմ, թե ով ինչքան ձայն ունի»:
Մարուքյանը չի կարծում, թե Երևանի ավագանու ընտրություններին թեժ բանավեճեր չեն լինի, քանի որ քաղաքական հիմնական ուժերն աջակցում են ներկայիս կառավարությանը: Ըստ նրա՝ թեժ բանավեճեր կարելի է ակնկալել յուրաքանչյուրի տեսլականը ներկայացնելիս:
«Այն, որ ուժերն աջակցում են Կառավարությանը, դեռ չի նշանակում, որ համաձայն են մեկը մյուսի ներկայացրած կառավարման մոդելին: Բանավեճը սրա շուրջ պետք է լինի, այլ ոչ թե նախկին քաղաքական մշակույթի պես, որ մեկը մյուսի վրա ցեխ շպրտի, այլ բանավիճեն, թե ով ինչպես է տեսնում Երևանի կառավարումը, ով ինչ խնդիր է տեսնում առաջնային լուծման»,- եզրափակեց Էդմոն Մարուքյանը: