Ինչու Պուտինը չմիջամտեց Հայաստանի «թավշյա» հեղափոխությանը. Նիկոլ Փաշինյանը հարցազրույց է տվել Deutsche Welle-ին (տեսանյութ)
ՀՀ վարչապետ Նիկոլ Փաշինյանը գերմանական Deutsche Welle հեռուստառադիոընկերության ռուսական ծառայությանը տված հարցազրույցում ասել է, որ իրենք մտադիր են երաշխավորել ժողովրդի, այլ ոչ անձանց ինչ-որ խմբի իշխանությունը, և ոչ մեկ չպետք է դրան խանգարի:
Այժմ Նիկոլ Փաշինյանի գլխավոր խնդիրը, նրա իսկ խոսքով, երկրում բարեփոխումներ իրականացնելն է և գործող քաղաքական համակարգը փոխելը:
Լրագրող Ժաննա Նեմցովան ՀՀ վարչապետի հետ խոսել է Հայաստանում հեղափոխության, Կրեմլի հետ հարաբերությունների և այն մասին, թե տեղի ունեցածում ինչ դեր են խաղացել սոցցանցերը:
Նիկոլ Փաշինյանը նշել է, որ հեղափոխության ընթացքում օլիգարխները չկարողացան ազդել երկրում քաղաքական իրավիճակի վրա, որովհետև ժողովուրդն իշխանությունը վերցրեց իր ձեռքը և մտադիր չէ այն բաց թողնել:
Արձագանքելով լրագրողի այն դիտարկմանը, թե հաճախ ՌԴ իշխանությունները բավական նյարդային են արձագանքում այլ հետխորհրդային երկրներում իշխանափոխությանը և ինչու ՌԴ նախագահ Վլադիմիր Պուտինը չմիջամտեց հայաստանյան իրադարձություններին, Նիկոլ Փաշինյանը նշել է. «Հայաստանը Հայաստան է, կարծում եմ՝ մեր պետության գլխավոր յուրահատկությունն այն է, որ մենք շատ ակնածանքով ենք վերաբերում մեր ինքնիշխանությանը»:
Նա նաև նշել է, որ Հայաստանը խաղաղասեր երկիր է և դրական է տրամադրված այդ թվում նաև Ռուսաստանի հանդեպ։
«Հայաստանը խաղաղ երկիր է, մենք խաղաղասեր ժողովուրդ ենք: Ես հուսով եմ, որ դուք ոչ մի ագրեսիվություն չեք նկատել, օրինակ՝ Եվրամիության, ԱՄՆ-ի, Իրանի, Վրաստանի և այլ երկրների դեմ: Իհարկե, եթե անհրաժեշտ լինի, մենք կարող ենք մեզ պաշտպանել: Բայց մենք սերտ հարաբերություններ ունենք Ռուսաստանի հետ, և ես վստահ եմ, որ դրանք է՛լ ավելի խորը կդառնան: Մենք լավ հարաբերություններ ունենք ԵՄ-ի հետ, որոնք մտադիր ենք շարունակել զարգացնել: Մենք նաև մտադիր ենք զարգացնել մեր հարաբերություններն ԱՄՆ-ի, Իրանի, Վրաստանի և դրանով հետաքրքրված բոլոր երկրների հետ»,- ասել է Նիկոլ Փաշինյանը:
Պատասխանելով ԵԱՏՄ-ի գագաթնաժողովի և Վլադիմիր Պուտինի թողած տպավորության մասին հարցին՝ Փաշինյանը նշել է նաև, որ ԵԱՏՄ-ի գագաթնաժողովում շատ հաճելի մթնոլորտ էր:
«Ես կարծում եմ, որ այդ փուլի համար մեզ մոտ շատ լավ անձնական հարաբերություններ են ձևավորել, որոնք ժամանակի ընթացքում միայն ավելի կբարելավվեն»,- հավելել է նա:
ՀՀ վարչապետը նշել է, որ Պուտինի հետ իրենք չեն խոսել այն մասին, թե Հայաստանն արտաքին գործընկերների հետ ինչ քաղաքականություն պետք է վարի: «Մենք խոսել ենք միայն հայ-ռուսական հարաբերությունների և ԵԱՏՄ-ի և ՀԱՊԿ պայմանագրերի շրջանակներում բազմակողմանի հարաբերությունների մասին: Բայց մենք չենք խոսել այն հարցերի մասին, որոնք կապված են Հայաստանի և Եվրամիության, Հայաստանի և Միացյալ Նահանգների և երրորդ երկրների հարաբերությունների հետ»,- ասել է նա:
Նիկոլ Փաշինյանը նաև անդրադարձել է, թե ինչ դեր են ունեցել սոցիալական ցանցերը հեղափոխության ընթացքում:
«Իմ քաղաքական գործունեության և բողոքի ցույցերի ընթացքում հեռուստատեսությունը փաստացիորեն փակ էր ընդդիմության համար: Շատ կարևոր է ունենալ ժողովրդի հետ շփման այլընտրանքային ալիք: Այժմ Facebook-ի իմ էջը մեծ լսարան ունի, որը կարելի է համեմատել հեռուստատեսության լսարանի հետ: Դա հանրության, քաղաքացիների հետ երկխոսության շատ արդյունավետ միջոց է: Իհարկե, Facebook-ը մեծ դեր խաղաց մեր հեղափոխության ընթացքում»,- ասել է նա: