2018-ին պետբյուջեից Արարատյան բակալավրիատին տրվել է 619 մլն դրամ, մնացած 1383 հանրակրթական դպրոցներին՝ 637 մլն դրամ. ԿԳ փոխնախարարի խոսքով՝ պետք է վերագնահատել ռեսուրսների բաշխումը
2018 թ.-ին պետբյուջեից Արարատյան բակալավրիատին տրվել է 619 մլն դրամ, մնացած 1383 հանրակրթական դպրոցներին՝ 637 մլն: ԿԳ փոխնախարար Արևիկ Անափիոսյանի խոսքով՝ պետք է վերագնահատել այն ռեսուրսները, որոնք ծախսվում են պետության կողմից՝ որակյալ կրթություն տրամադրելու նպատակին ծառայելու համար. «Այստեղ հարց է առաջանում՝ պետությունն իրավունք ունի՞ հարկատուներից ստացվող ռեսուրսն ուղղել Արարատյան բակալավրիատի քիչ թվով շահառուներին»,- նշեց նա:
Ըստ «Հանուն հավասար իրավունքների» նախաձեռնության հետազոտության՝ Կրթության գերազանցության ազգային ծրագրին 2014-ից ի վեր շուրջ 4.5 մլն դոլար է տրվել ՀՀ պետական բյուջեից՝ գերազանցության ծրագիրը իրականացնելու համար: Գերազանցության ծրագիրը՝ Արարատյան բակալավրիատը, ստեղծվել է «Այբ» հիմնադրամի կողմից և լրամշակվել Կրթության գերազանցության ազգային ծրագրի շրջանակում:
Այս ընթացքում միայն 246 212 631 մլն դրամ (512 000 դոլար) վճարվել է ԿԳԱԾ ադմինիստրատիվ և գրասենյակային կառավարման և տեխնիկայի ձեռքբերման համար. «Երբ Հայաստանում հանրակրթական դպրոցների առնվազն 38 տոկոսը ջեռուցման համակարգ չունի, իսկ 8 տոկոսը չունի կոյուղի, զուգարան»,- ասվում է հետազոտության մեջ:
Միայն 2018 թ.-ի բյուջեով «Այբ» հիմնադրամի գերազանցության ծրագրի համար պետբյուջեից տրվել է 619,693,500 մլն դրամ, որով սպասարկվելու է 20 դպրոց, վերապատրաստվելու՝ 110 ուսուցիչներ: Համեմատության համար, օրինակ, կրթության ազգային ինստիտուտի բյուջեն 637,574,500 միլիոն է, որը սպասարկում է 1383 հանրակրթական դպրոց և այդքան դպրոցի ուսուցիչ:
ՀՀ կրթության և գիտության նախարարի տեղակալ Արևիկ Անափիոսյանը Tert.am-ի հետ զրույցում նշեց, որ պետությունը պետք է վերագնահատի որակյալ կրթություն տրամադրելու նպատակին ուղղված ռեսուրսները:
«Հիմա ընթացքի մեջ է գնահատումը, և հետո պետք է հասկանանք, թե ինչպիսի քաղաքականություն ենք ընտրում: Արդյոք մենք ուզո՞ւմ ենք գումարը տրամադրել մեկ ծրագրի, որտեղ կան 20 թեկնածու միջնակարգ և ավագ դպրոցներ, թե՞ արդյոք դա ուզում ենք ուղղել հանրապետության 1383 դպրոցներ՝ այդ դպրոցների ծրագրերի բարելավման համար»,- նշեց փոխնախարարը:
Նրա տեղեկացմամբ՝ քաղաքականության որդեգրման մասով պաշտոնական հայտարարությունը կլինի հաջորդ շաբաթվա ընթացքում: Ներկայիս կառավարության գաղափարախոսությունը հետևյալն է՝ կրթության որակը բարձրացնել՝ ավելի շատ թվով շահառուներ ներառելով:
Արևիկ Անափիոսյանի կարծիքով՝ պետությունն ունի պարտավորություն բոլոր երեխաներին տալու հավասար հնարավորություններ և պայմաններ որակյալ կրթություն ստանալու համար:
«Երեխան, որը հնարավորություն է ստանում քննությունները հանձնելով սովորել այն ավագ դասարաններում, որտեղ կրթության գերազանցության ազգային ծրագիրը ներդրված է, դա նշանակում է, որ այդ երեխան կա՛մ ինքնին փայլուն ու պայծառ է, կա՛մ նա սոցիալապես ապահով միջավայրից է գալիս և կարողացել է «կողքից», մասնավոր պարապմունքներով հասնել այդ մակարդակին: Խնդիրն այն է, որ եթե երեխան փայլուն չէ, սոցիալապես անապահով միջավայրից է, ապա հարց է առաջանում՝ մենք թիրախավորում ենք որպես շահառու բոլոր երեխաներին, թե միայն փայլուն երեխաներին»,- նշեց նա:
Արևիկ Անափիոսյանն ընդգծեց, որ սոցիալական արդարության և սոցիալական հավասարության տեսանկյունից ճիշտ չէ նախկին կառավարության մոտեցումը:
«Ես բազմիցս ասել եմ, որ գոյություն ունի սոցիալական արդարության հայեցակարգ: Կրթության ազգային ինստիտուտը սպասարկում է 1380 դպրոցների և շուրջ 36 հազար ուսուցիչների վերապատրաստումներ է իրականացնում: Հիմա արդյունավետության հետ կապված հարց է առաջանում՝ պետությունը իրավունք ունի արդյոք նմանատիպ նպատակի համար, որն ուղղված է ուսուցիչների վերապատրաստմանը, ծրագրերի բարելավմանը, հարկատուներից ստացվող ռեսուրսն ուղղորդել քիչ թվով շահառուների համար»,- ասաց նա:
Փոխնախարարը վստահեցնում է, որ գերազանցության ծրագրի վրա պետության միջոցների հաշվին ծախսված 4.5 մլն դոլարն անպայման օգտագործվելու է հօգուտ հանրակրթական դպրոցների:
«Նախարարությունում կա քաջ գիտակցում, որ հարկատուների ռեսուրսներ են ծախսվել, և ծրագրի շրջանակում ուսուցիչներ են վերապատրաստվել: Այս ուսուցիչները մեզ համար շատ կարևոր ռեսուրս են հանդիսանում, և անպայմանորեն իրենց ռեսուրսներն օգտագործվելու են հանրակրթության ոլորտում՝ ռեֆորմների իրականացման համար: Թե դրանք ինչ տեսքով կլինեն, արդեն որոշ ժամանակ հետո կլինի պաշտոնական որոշում այդ ամենի հետ կապված»,- հայտնեց նա:
Ինչ վերաբերում է կրթության գերազանցության ազգային ծրագրի կասեցման հարցին, Արևիկ Անափիոսյանը պատասխանեց. «Կասեցման հետ կապված լավ կլինի հետո խոսենք, որովհետև կան պետություն-մասնավոր սեկտոր պայմանագրային պայմանավորվածություններ, և պետք է հասկանանք, թե ինչպես ենք այդ պայմանավորվածությունների մեջ մենք ֆորմալ առումով իրավական լուծումներ գտնում»: