Հյուսիսկորեական պատվիրակությունը Թրամփ-Կիմ Չեն Ըն հանդիպմանն ընդառաջ ժամանել է Սինգապուր
Հյուսիսային Կորեայի պատվիրակությունը ժամանել է Սինգապուր՝ քննարկելու Միացյալ Նահանգների հետ կայանալիք պատմական հանդիպման մանրամասները: Այս մասին գրում է korrespondent.ru-ն՝ հավելելով, որ ամերիկյան պատվիրակությունը ևս Սինգապուր է ուղևորվում:
Հայտնի է, որ այստեղ կայանալու է իր տեսակի մեջ բացառիկ հանդիպում Միացյալ Նահանգների նախագահ Դոնալդ Թրամփի ու հյուսիսկորեացի առաջնորդ Կիմ Չեն Ընի միջև:
Հիշեցնենք, որ ավելի վաղ Թրամփը հայտարարել էր հունիսի 12-ին Սինգապուրում իր ու հյուսիսկորեացի առաջնորդի միջև կայանալիք պատմական հանդիպման չեղարկման մասին: Նա պատճառաբանել էր, որ պաշտոնական Փհենյանը Վաշինգտոնի հետ համագործակցության եզրեր չի փնտրում ու թշնամական վերաբերմունք է ցուցաբերում:
Դրան ի պատասխան Հյուսիսային Կորեան ասել էր, որ անկախ ամեն ինչից՝ պատրաստ է հանդիպել Թրամփի հետ: Դրան հաջորդել էր Վաշինգտոնից ստացված նոր տեղեկությունը, համաձայն որի՝ Թրամփ-Կիմ Չեն Ըն հանդիպումը կկայանա:
Հայտնի է, որ երկու պետությունների ղեկավարները պետք է քննարկեն երկկողմ հարաբերությունների կարգավորումը: Հյուսիսային Կորեան պահանջում է, որ ԱՄՆ-ն վերջ տա Հարավային Կորեայի հետ համատեղ զորավարժությունների անցկացմանը՝ ապահովելով Փհենյանի անվտանգությունը: Մինչդեռ Վաշինգտոնը հյուսիսկորեական վիճահարույց միջուկային և հրթիռային ծրագրերի սառեցում է պահանջում: