Թրամփը պաշտոնից ազատել է պետքարտուղար Ռեքս Թիլերսոնին
Միացյալ Նահանգների նախագահ Դոնալդ Թրամփը պաշտոնից ազատել է պետքարտուղար Ռեքս Թիլերսոնին, նրան այդ պաշտոնում կփոխարինի Կենտրոնական հետախուզական վարչության ղեկավար Մայք Պոմպեոն: Այդ մասին հայտնում է Washington Post-ը՝ վկայակոչելով Սպիտակ տան պաշտոնյաներին:
Թրամփը Թիլերսոնին խնդրել է հեռանալ դեռևս անցած ուրբաթ, և դիվանագետը երկուշաբթի դադարեցրել է իր այցն Աֆրիկա՝ վերադառնալով Վաշինգտոն:
Պոմպեոյի փոխարեն ԿՀՎ ղեկավարի պաշտոնը կստանձնի ներկայիս տնօրենի տեղակալ Ջինա Հեսփելը:
«Ես հպարտ եմ Կենտրոնական հետախուզական վարչության ղեկավար Մայք Պոմպեոյին մեր նոր պետքարտուղարի պաշտոնում նշանակելու առնչությամբ»,- հայտարարել է Թրամփը The Washington Post-ին ուղղված հաղորդագրությունում:
Թրամփը նորությունը հաստատել է նաև Twitter-ի իր էջում:
«ԿՀՎ ղեկավար Մայք Պոմպեոն կդառնա մեր նոր պետքարտուղարը: Նա հիանալի կաշխատի: Շնորհակալություն Ռեքս Թիլերսոնին իր ծառայության համար: Ջինա Հեսփելը կդառնա ԿՀՎ նոր ղեկավարը: Շնորհավոր բոլորին»,- գրել է նա:
Mike Pompeo, Director of the CIA, will become our new Secretary of State. He will do a fantastic job! Thank you to Rex Tillerson for his service! Gina Haspel will become the new Director of the CIA, and the first woman so chosen. Congratulations to all!
— Donald J. Trump (@realDonaldTrump) March 13, 2018