Դիմորդների խնդիր կա` հատկապես քիմիական տեխնոլոգիաների ֆակուլտետներում, ամենամեծ մրցակցությունը ՏՏ ոլորտում է. ՀԱՊՀ ռեկտոր
Հայաստանի ազգային պոլիտեխնիկական համալսարանի ֆակուլտետներում թափուր տեղեր չկան, դիմորդների մրցակցություն լինելու է: Այս մասին Tert.am-ի հետ զրույցում ասաց ՀԱՊՀ ռեկտոր, պրոֆեսոր Ոստանիկ Մարուխյանը: Նրա խոսքով՝ այս տարի էլ առաջին փուլով դիմած դիմորդների թիվը շատ չնչին չափով է տարբերվում նախորդ տարվանից՝ մոտ 32-ով պակաս է: Միաժամանակ, ռեկտորն ակնկալում է, որ 2-3 րդ փուլով գործերի ընդունելությունից հետո, նույնիսկ նախորդ տարվա ցուցանիշները կգերազանցեն:
«Ես զգացի, որ վերջին իրադարձությունների արդյունքում, այսինքն՝ Գերազանցության կենտրոնի բացումը, մեր ստացած նվիրաբերությունը, մեզ այլ արդյունքներ կտա: Նվիրաբերությամբ մենք ստեղծում ենք անօդաչու սարքերի լաբորատորիա, չեմ թաքցնի, որ բարձրաձայնել եմ այն մասին, որ դա լինելու է մագիստրոսական լավագույն ծրագրերից մեկը: Ամենայն հավանականությամբ, սեպտեմբերի 1-ից մենք կբացենք այդ լաբորատորիաները և դա ևս մեզ համար ստեղծում է ռեալ հնարավորություններ: Գիտեք՝ անօդաչու սարքեր ասելը չի նշանակում մի անօդաչու սարք, նշանակում է էներգետիկներ, էլեկտրատեխնիկներ, ավտոմատ կառավարման համակարգի մասնագետներ, IT մասնագետներ և այլն: Սա մի ամբողջ համախումբ է, բայց կարևորն այն է, որ բաց է լինելու բոլոր բուհերի ուսանողների համար: Մենք ունենք հեռահար նպատակ այդ լաբորատորիան կապել արտասահմանյան որոշ գործընկերների հետ, մասնավորապես, ռեալ շանս կա Իլինոյսի համալսարանի նմանօրինակ կենտրոնի հետ համագործակցության»,- ասաց նա:
Մարուխյանը նշեց, որ ամենամեծ մրցակցությունը տեղեկատվական տեխնոլոգիաների ոլորտում է՝ հատկապես տեղեկատվական անվտանգության, համակարգչային ճարտարագիտության ոլորտում: ՀԱՊՀ ռեկտորը նկատել է, որ այս տարի դիմորդներն ավելացել են կիրառական մաթեմատիկայի և ինֆորմատիկայի ոլորտներում:
«Որոշակի վերաբաշխում է եղել էներգետիկայի մասնագետների գծով: Եթե առաջ հիմնականում դիմում էին էլեկտրաէներգետիկայի գծով, ապա այսօր նկատվում է տեղաշարժ ատոմային, ջերմային կայանքների ուղղությամբ, իսկ էլեկտրաէներգիան 3-րդ կողմ է մղվել: Թեպետ սա էլ եմ բացատրում, թե ինչու, որովհետև այժմ ընթացքի մեջ է ատոմային էլեկտրակայանի ժամկետի երկարաձգման հարցը, վերակառուցվում է, այսինքն՝ ռեալ աշխատատեղերի հնարավորություն կա: ՋԷԿ ոլորտում տեսնում ենք, որ ՀՀ-ում երկրորդ բլոկի շինարարություն է, շուկան զգացվում է, իսկ մարդիկ արձագանքում են այդ մասնագիտություններին»,- շարունակեց Ոստանիկ Մարուխյանը:
ՀԱՊՀ ռեկտորի համար զարմանալի է, որ այս տարի էլեկտրոնիկայի բնագավառում դիմորդների թիվը նվազել է: Մարուխյանի դիտարկմամբ՝ խնդիրը պայմանավորված է տեղեկատվության սխալ ընկալմամբ, կամ էլ խնդիրներ է առաջացրել մասնագիտության անվանափոխումը: Վերջինս խնդիր է տեսնում հատկապես քիմիական տեխնոլոգիաների ֆակուլտետներում:
«Հանիրավի, երբեմն, այնպիսի անուններ դրեցին, որ մարդ չի կարողանում ընկալել, թե խոսքն ինչ մասնագիտացման մասին է: Օրինակ՝ մասնագիտության անունը դրված է ավտոմատացում, մեկին այդ ֆակուլտետը խորհուրդ տալու համար պիտի մանրամասն բացատրես, կամ՝ չափագրում: Մենք մասնագիտությունների անվան խնդիր ունենք, թեպետ կան նաև մասնագիտություններ, որոնց դեպքում տեղի խնդիր ունենք, մասնավորապես, քիմիական տեխնոլոգիաների ոլորտում: Սակայն ֆակուլտետը չի փակվի, քանի որ դա պոլիտեխնիկի հիմնադիր ֆակուլտետն է»,- եզրափակեց Մարուխյանը: