Президентлыкка кандидат итеп теркәү өчен Путин Үзәк сайлау комиссиясенә документ тапшырды
Хәзерге дәүләт башлыгы Владимир Путин Россия Президентына кандидат буларак теркәлү өчен Россия Үзәк сайлау комиссиясенә документлар тапшырды. Бу хакта аның матбугат сәркатибе Дмитрий Песков әйтте, дип хәбәр итә РИА Новости.
«Әйе. Тапшырды», — дип әлеге сорауга җавап итеп хәбәр иткән Кремльнең рәсми вәкиле.
Элегрәк «Татар-информ» хәбәр иткәнчә, Россия Президентын сайлаулар өч көн —2024 елның 15-17 мартында дәвам итәчәк. Үзәк сайлау комиссиясе аларны әзерләү буенча чаралар календарь планын раслады.
Хәзерге Россия лидеры Владимир Путин яңа президентлык срогына тәкъдим ителергә карар итте. Җиңү очрагында аның өчен бу инде бишенче Президент каденциясе булачак.
Путинның үз-үзен тәкъдим итүен яклау командасына 700дән артык кеше кергән. Соңрак «Бердәм Россия» партиясе съезды аның кандидатурасын бертавыштан хуплады.