Татарстанда киләсе атна башында бозлавык һәм томан көтелә, урыны белән яңгыр явачак
Татарстанда киләсе атна башында бозлавык һәм томан көтелә, урыны белән явым-төшем күзәтелергә, көчле җил чыгарга мөмкин. Бу хакта ТР Гидрометеорология һәм әйләнә-тирә мохитне күзәтү идарәсе сайтында хәбәр ителә.
Дүшәмбе, 13 ноябрьдә, төнлә һәм иртән республикада яңгыр һәм җепшек кар рәвешендә явым-төшем фаразлана. Урыны белән томан һәм бозлавык көтелә. Көндез бераз яңгыр явачак. Көньяк-көнчыгыштан секундына 7-12 метр тизлектә искән җил көньякка күчә, урыны белән аның тизлеге секундына 15-18 метрга кадәр җитәчәк. Төнлә һава температурасы +3..-1, көндез +4..+9 градус тәшкил итәчәк.
Төнлә һәм иртән юлның аерым участокларында бозлавык хасил булырга мөмкин.
Сишәмбе бераз яңгыр явачак. Көньяк-көнбатыштан секундына 7-12 метр тизлектә җил исәчәк, төнлә аның тизлеге урыны белән секундына 15 метрга кадәр җитәчәк. Төнлә һава температурасы +1..+6, көндез +3..+8 градус тәшкил итәр дип көтелә.
Чәршәмбе, 15 ноябрьдә, төнге сәгатьләрдә бераз яңгыр явачак, көндез явым-төшем көтелми. Көньяк-көнбатыштан секундына 5-10 метр, урыны белән 12 метр тизлектә җил исәчәк. Төнлә һава температурасы +3..-2 градус тәшкил итсә, көндез +1..+6 градус җылы булуы көтелә.