Татарстанлылар муниципаль хезмәтләрне теләсә кайсы күпфункцияле үзәктән алачак
Татарстанның күпфункцияле үзәкләрендә экстерриториаль принцип буенча муниципаль хезмәтләр күрсәтелә ала. Ягъни республикада яшәүчеләрнең муниципаль берәмлекләрнең башкарма комитетлары хезмәтләрен тору урыныннан читтә дә алу мөмкинлеге булачак. Бу хакта Татарстан Дәүләт идарәсен цифрлы нигездә үстерү, мәгълүмат технологияләре һәм элемтә министрлыгының матбугат хезмәте хәбәр итә.
«Бу кешеләргә кирәкле белешмәләр һәм документлар алу өчен бер муниципаль районнан икенчесенә йөрмәскә мөмкинлек бирә. Шул рәвешле, хезмәтләр максималь уңайлы була бара», диелә хәбәрдә.
Мисал өчен, элек Казан кешесенә Питрәч районында шәхси йорт төзи башлау турында хәбәр итү өчен җирле башкарма комитетка яки күпфункцияле үзәккә генә мөрәҗәгать итәргә туры килсә, хәзер республиканың теләсә кайсы күпфункцияле үзәгенә бара ала. Нәтиҗәләрне шулай ук теләсә кайсы күпфункцияле үзәктә алырга мөмкин булачак.
Экстерриториаль категориягә район муниципалитетлары хезмәтләренең 42 төре һәм Казан башкарма комитетының 25 төре күчерелде.