Икътисадчы сентябрь аена доллар курсын фаразлады
Августта Федераль резерв системасы, Европа үзәк банкы һәм Россия Банкының процент ставкалары буенча утырышлары көтелми. Бу рубльнең әлеге карарлардан җитди ориентирлар алмаячагын аңлата, позитив та, тискәре дә яңалык булмаячак. Бу хакта «Россия газетасына» икътисадчы, «BitRiver» оешмасының коммуникацияләр буенча директоры Андрей Лобода сөйләде.
Белгеч сүзләренчә, августның беренче декадасында Россиядә июль өчен инфляция мәгълүматлары чыгачак. Әгәр ул нык артса, ул Россия Банкының сентябрьдә төп ставканы арттыру индикаторы булырга һәм рубльнең ныгуына йогынты ясарга мөмкин.
«Рубль өчен шулай ук АКШта июль аенда чыгачак инфляция мәгълүматлары да мөһим булачак. Инфляцияне акрынайту доллар көчсезләнүенә китерергә мөмкин», – диде Андрей Лобода. Эксперт тарафыннан күрсәтелгән барлык факторларга карамастан, рубль сәяси һәм санкцион куркынычларга дучар булып кала бирә. «Геосәяси вазгыять кискенләшкән очракта, рубль кыска вакыт эчендә арзаная ала», – дип саный Андрей Лобода.
Әмма август ахырына Көньяк Африка Республикасында узачак БРИКС саммитыннан рубль өчен уңай яңалыклар булырга мөмкин. Икътисадчы фикеренчә, анда БРИКС бердәм сәүдә валютасы турында гариза булырга мөмкин. Бу дөнья икътисадын дедолларизацияләү процессын тизләтүче мөһим вакыйга булырга мөмкин.
«Шулай итеп, сентябрь башына доллар курсы 88-95 сум була, ә евро курсы 97-105 сум тирәсе торачак. Юань курсы 12,3-13,3 сум чигеннән артмаячак», – дип фаразлый Андрей Лобода.