Миңнеханов хакимиятне «акча өләшергә генә түгел», ә проектларны контрольдә тотарга өндәде
ТР Рәисе матбугат хезмәте
Һәр дәүләт һәм муниципаль орган коррупцион хокук бозуларны профилактикалау өстендә эшләргә тиеш. Мондый фактлар республика абруена җитди зыян китерә һәм хакимияткә ышанычсызлык тудыра. Бу хакта Татарстан Рәисе Рөстәм Миңнеханов ТР Коррупциягә каршы көрәш эшен координацияләү комиссиясе утырышында әйтте.
Миңнеханов сүзләренчә, 2022 елда коррупцион хокук бозулар Татарстанның икътисади эшчәнлегенең барлык төп тармакларында ачыкланган.
«Бүген теләсә кайсы кеше ачык чыганакларда цифрлы эз калдыра. Коррупциягә каршы көрәш эшләре хокук бозуларны ачыклау өлешендә аларны анализлауны максат итеп куя. Мондый очраклар массакүләм мәгълүмат чараларында киң яктыртыла, республика абруенда тискәре чагылыш таба, хакимияткә ышанычсызлык тудыра. Болар барысы да дәүләт хакимияте ягыннан реакция таләп итә. Хокук бозуларны профилактикалау - һәр дәүләт һәм муниципаль органның бурычы», - диде Татарстан Рәисе.
Аның сүзләренчә, теләсә нинди хокук бозуны башлангыч стадиядә үк кисәтергә мөмкин. Моның өчен җитәкчеләр тыгыз һәм системалы профилактик эш алып барырга тиеш.
Ул районнарны ритуаль хезмәтләр өлкәсендә эшләрнең оештырылмаган булуы өчен тәнкыйтьләде. Аларда махсус оешмалар юк, һәм хезмәтләр коммерцияле компанияләр тарафыннан күрсәтелә.
Тагын бер проблема - авыл хуҗалыгы эшчәнлеге белән шөгыльләнүче фермерларга һәм оешмаларга бирелә торган грантлар. «Акча булган урында коррупция һәрвакыт бар. Дәүләт авыл хуҗалыгы җитештерүчеләренә грантлар бирә. Әмма акча өләшү генә түгел, проектларны контрольдә тоту да кирәк», - диде Татарстан җитәкчесе.