Россия этнография музеенда «Туган авылым» бәйрәме оештырганнар
Санкт-Петербургның Россия этнография музеенда 30 апрель көнне әлеге музей һәм «Файда» Татар мәдәни җәмгыяте «Туган авылым» чарасы оештырганнар. Бу хакта «Файда» татар мәдәни җәмгыяте ВКдагы үз төркемендә яза.
«Концерт программасын «Файда» җәмгыяте җитәкчесе Айрат Маннанов ачып җибәрде. Татарстан Республикасының Санкт-Петербург шәһәрендәге һәм Ленинград өлкәсендәге даими вәкиле урынбасары Дамир Сабиров, Этнография музееның экскурсияләр һәм кунакларны каршы алу бүлеге җитәкчесе Ольга Подшувейт бәйрәм белән котладылар», – дип хәбәр итә чыганак.
Чара «Иман һәм яхшылык юлы: Россия мөселман халыкларының сәнгать традицияләре» дигән темага экскурсия белән башланган. Янифә Федосова традицион татар милли костюмнары турында сөйләп, кунакларга мастер-класс күрсәткән.
Фото: © «Файда» татар мәдәни җәмгыяте
Айгөл Селезнева татар шагыйре Габдулла Тукай тормышындагы кайбер фактлар белән уртаклашкан, Диләрә Йосыпова ислам диненең шагыйрь иҗатына тәэсире турында сөйләгән.
«Файда» татар мәдәни җәмгыяте төркемендә язуларынча, иҗат коллективы Габдулла Тукай әкиятләре буенча «Шүрәле Су анасы әкиятендә кунакта» дигән театральләштерелгән тамаша әзерләгән. Шүрәле ролендә — Мансур Аббазов, Су анасы — Линара Куликова, бала — Диләрә Йосыпова, күбәләк— Милана Федосова, әни— Янифә Федосова, әкиятче булып Рәхимә Моисеева чыгыш ясаган.
Фото: © «Файда» татар мәдәни җәмгыяте
Концерт программасын Санкт-Петербургның «Мирас» татар мәдәни үзәге каршында эшләүче «Мирас» бию ансамбле, Ленинград өлкәсе Ломоносов районыннан «НУР» татар фольклор ансамбле дәвам иткән. Венера Думцева «Шүрәле» балетыннан Сөембикә вариациясен башкарган. «Былбыл» Санкт-Петербург татар халык театры коллективы «Шүрәле» эксперименталь пьесасыннан кичке уен өзеген тәкъдим иткән, чарада «Файда» эстрада-фольклор ансамбле, аерым чыгыш ясаучылар һәм балалар да катнашкан.
Фото: © «Файда» татар мәдәни җәмгыяте
Бәйрәм «Туган тел» җыры белән тәмамланды, дип хәбәр итә чыганак.