Фальков: 2023 елгы кабул итү кампаниясендә кискен үзгәрешләр булмаячак
Быел мәктәпне тәмамлаучылар югары уку йортларына 2022 елның көзендә бастырылган барлык укыту программалары буенча керә алачак. Бернинди дә зур үзгәрешләр булмаячак. Бу хакта пәнҗешәмбе көнне РФ фән һәм югары белем министры Валерий Фальков белдерде. Бу хакта «Российская газета» хәбәр итә.
«Быел барысы да абитуриентлар һәм аларның ата - аналарына яхшы таныш кагыйдәләр буенча узачак, кискен үзгәрешләр булмаячак, - диде Фальков. - Кабул итү кагыйдәләре һәм керү имтиханнары исемлеге 2022 елның көзендә кабул ителде һәм бастырылды, барысы да саклана».
Фальков югары уку йортларына керү өчен документларны кабул итү 20 июньнән дә соңга калмыйча башлануын искәртте. Аннары документларны эшкәртү, иҗади һәм һөнәри юнәлештәге керү сынауларын тапшыру башланачак. 28-30 июльдә аерым категорияләргә, мәсәлән, олимпиадада җиңүчеләргә өстенлекле кабул итү узачак, ә 3-9 августта кабул итүнең төп этабы була.
Министр әйтүенчә, югары белем бирүнең яңа илкүләм системасына күчүгә бәйле рәвештә кайбер югары уку йортларыннан бакалавриат программаларын белгечлеккә алыштыруга мөрәҗәгатьләр килгән. Ләкин Фальков абитуриентларга бу берничек тә тәэсир итмәячәк, кергәндә бернәрсә дә үзгәрмәячәк, дип ышандырды.
«Яңа илкүләм мәгариф системасына күчкәндә абитуриентлар һәм студентларның хокуклары сакланачак. Барысы да кабул ителгән программалар буенча укып бетерә алачак, - дип искәртте Валерий Фальков. – Үзгәрешләр 2024 һәм аннан соңгы елларда кабул итү кампаниясендә булачак».