Буа ветераннарына Рөстәм Миңнеханов исеменнән бүләк тапшырдылар
ТР Буа районы матбугат хезмәте
Татарстанның Буа районында Бөек Ватан сугышы ветераннарын алда торган Җиңү көне белән котлый башладылар. Район башлыгы Рәнис Кәмәртдинов Әнвәр Низамов һәм Рәүф Төхвәтуллинның өенә барды.
Муниципалитет җитәкчесе һәр ветеранга ТР Рәисе Рөстәм Миңнеханов исеменнән открытка һәм бүләк тапшырды. Аларны шулай ук Җиңү парадына һәм чәй табыны янында традицион очрашуга чакырдылар.
ТР Буа районы матбугат хезмәте
«Рәүф Ибраһим улына ел башында 103 яшь тулды, әле ул бүген дә егетләрчә парад формасын кия. Әнвәр Борһан улы бигрәк тә открыткага куанды. Бу – якынлашып килүче 9 Май белән беренче котлаулар әле», - диде Рәнис Кәмәртдинов.
Бүген Буа районында сигез Бөек Ватан сугышы ветераны яши.
«Татар-информ» агентлыгына район хакимиятеннән хәбәр итүләренчә, муниципаль берәмлек исеменнән дә һәр ветеранга бүләк тапшырылачак.
Ветераннар котлауларны шатланып кабул итә. «Мин бик тә канәгать» - дип, Рәүф Төхвәтуллин республика җитәкчелегенә рәхмәтләрен җиткерде.