Урамда хатын-кызны чүкеч белән үтергән ир-атка карата ачылган җинаять эше судка җибәрелде
Казанда хатын-кызга чүкеч белән һөҗүм итеп, аны үтергән 54 яшьлек ир-атка карата ачылган җинаять эше судка җибәрелгән. Татарстан Республикасы прокурорының өлкән ярдәмчесе Руслан Галиев шул турыда хәбәр итте.
Быел 26 гыйнварда Краснококшайск урамындагы йорт янында ир-атның 36 яшьлек хатын-кызга чүкеч белән һөҗүм итүен «Татар-информ» хәбәр иткән иде. Ул аңа берничә тапкыр суккан һәм урыннан качкан. Хатын-кыз вафат булган, ир-атны тоткарлаганнар.
Тикшерүчеләр фикеренчә, ир-ат үч алырга теләгән. Ул хатын-кызга кредит алырга ярдәм сорап мөрәҗәгать иткән, хатын-кыз акча алган һәм үз бурычын үтәмәгән.
«Үтерү» маддәсе буенча җинаять эше Казанның Киров район судына җибәрелгән.