Төмән өлкәсендә “Таң йолдызы” фестивале узды
https://tatar-congress.org/
Төмән өлкәсендә узган Татар мәдәнияте көннәре кысаларында Тубыл шәһәрендә төрки телле халыкларның XXXII «Таң йолдызы» һәм XIII «Халык сәнгате» үзешчән сәнгать осталары бәйгесе узды. 15 нче мәктәпнең сәхнәсендә 200дән артык катнашучы чыгыш ясады. Бу хакта Бөтендөнья татар конгрессы матбугат хезмәте хәбәр итә.
Тубыл шәһәре мәктәпләреннән, балалар бакчалырыннан, мәдәният үзәкләреннән, район мәктәпләреннән килгән төрле яшьтәге катнашучылар үз чыгышларында төрки халыклар мәдәниятен, телен, сәнгатен, гореф-гадәтләрен, татар мәдәниятенең күпкырлы булуын күрсәтә. Шигырь сөйли, җырлый, бии.
Фестиваль кысаларында кул эшләре осталарының күргәзмәсен оештыру да традициягә кергән. Татар мәдәниятен, халык традицияләрен саклауда, популярлаштыруда зур өлеш керткән кул эшләре осталары милли орнаментлы савыт, бизәнү әйберләрен күрсәтә, милли темага рәсемнәр тәкъдим ителә, диелә хәбәрдә.