Татарстанда хатын-кызлар арасында «Халисә» IV Россиякүләм Коръән укучылар бәйгесе узачак
14 майда Ютазы районы Урыссу бистәсендә хатын-кызлар арасында «Халисә» IV Россиякүләм Коръән укучылар бәйгесе үткәреләчәк. Конкурс Татарстан мөфтияте, Татарстанның көньяк-көнчыгыш төбәге казыяте, Ютазы мөхтәсибәте тарафыннан Ютазы районы хакимияте һәм Мәрданшиннар гаиләсе ярдәме белән оештырыла. Бу хакта ТР Диния нәзарәте матбугат хезмәте хәбәр итә.
Конкурс мөселманнарны хакыйкый Ислам белеменә тарту, шулай ук мөслимәләрдә Коръән буенча белем дәрәҗәсен арттыру һәм Коръән ятларга омтылышларын үстерү максатыннан үткәрелә. Әлеге бәйге Россиянең төрле төбәкләреннән килгән мөслимәләр арасында иң яхшы укучылар һәм Коръән хафизларны билгеләргә мөмкинлек бирәчәк. Төп бүләк – гомрәгә юллама. Шулай ук һәр номинациядә җиңүче өчен 50 000 сум премия, район башлыгы исеменнән ноутбук яки 30 000 сум премия кебек бүләкләр каралган. Алдынгы урыннарга чыгучылар шулай ук кыйммәтле призлар, ә барлык катнашучылар кызыксындыру бүләкләре алачак.
Бәйгедә Россия мөселман хатын-кызлары катнаша ала, яшь буенча чикләүләр юк. Һәр районнан яки уку йортыннан бер номинациядә ике конкурсант кына катнаша ала. Гаризалар 2023 елның 30 нчы мартына кадәр кабул ителә, диелә хәбәрдә.