Татарстанда өлкәннәргә телефон аферистларына эләкмәү ысуллары турында сөйләделәр
Татарстанда «Финанс грамоталылыгы культурасын тәрбиялибез» проекты кысаларында пенсиягә кадәрге һәм пенсия яшендәге кешеләр белән очрашу узды. Анда аларга телефон аферистлары хәйләләренә эләкмәү турында җентекләп сөйләделәр. Россия Эчке эшләр министрлыгының Казан буенча идарәсе матбугат хезмәте шулай дип хәбәр итә.
Очрашуда катнашучыларның сорауларына Россия Эчке эшләр министрлыгының Казан буенча идарәсенең массакүләм мәгълүмат чаралары белән белән элемтә бүлеге җитекчесе эчке хезмәт майоры Рафаэль Сәгъдиев һәм Россия банкының ТР буенча белгечләре җавап бирде.
Әңгәмә барышында очрашуда катнашучылар мошенниклыкның иң киң таралган ике алымы – «Синең туганың бәлагә эләкте» һәм «Банк хезмәткәрләре булып шалтыратулар» турында фикер алышты. Шулай ук аларга каршы тору алымнары турында да аерым сөйләштеләр.
«2022 елда милек җинаятьләре саны кимү күзәтелде, ул дистанцион рәвештә кылынган банк карталарыннан һәм башка счетлардан урлаулар саны кимү хисабына азайды. Теркәлгән мошенниклык очраклары саны узган ел дәрәҗәсендә калды диярлек. Телекоммуникацион технологияләр кулланып кылынган җинаятьләрне ачу буенча нәтиҗәләр яхшырды», – дип төгәлләштерде Рафаэль Сәгъдиев.
Чара ахырында барлык катнашучыларга финанс грамоталылыгы буенча мәгълүмат кәгазьләре тапшырылды.