Хөснуллин Кырым күперендә гадәттән тыш хәлгә бәйле комиссия җитәкчесе итеп билгеләнде
Россия Премьер-министры Михаил Мишустин Кырым күперендә булган гадәттән тыш хәлгә бәйле хөкүмәт комиссиясе булдырды, аны вице-премьер Марат Хөснуллин җитәкли, дип хәбәр итте Россия Министрлар Кабинетының матбугат хезмәте.
Комиссия составына шулай ук Транспорт министрлыгы, Гадәттән тыш хәлләр министрлыгы, Төзелеш министрлыгы, Россия диңгез-елга флоты, Росавтодор, Россия тимер юллары, Росгвардия, Эчке эшләр министрлыгы һәм ФСБ вәкилләре, Краснодар крае һәм Кырым республикасы башлыклары керде.
«Шушы сәгатьләрдә Кырымга очам. Күпернең җимерелгән урыннарын шәхсән карап чыгачакмын. Мөмкин кадәр кыска вакыт эчендә аның эшен торгызуга бәйле карарны урында кабул итәчәкбез», – дип хәбәр итте Хөснуллин үзенең телеграм-каналында.
Моңа кадәр әлеге гадәттән тыш хәлнең сәбәпләрен ачыклау һәм аның нәтиҗәләрен бетерү буенча комиссия төзү эшен Россия Президенты Владимир Путин йөкләгән иде.
Искәртеп узабыз, бүген иртән Кырым күперендә Кырым ярымутравы юнәлешендә хәрәкәт итүче тимер юл составындагы җиде ягулык цистернасы янды. Соңрак Илкүләм террорчылыкка каршы комитет янгын йөк автомобилен шартлату сәбәпле чыкканын хәбәр итте. Тикшерү комитеты һәлакәттән соң җинаять эше кузгатты.