Полиция Казанның Пушкин урамында машинадан портфель урлаучыны эзли
Полициянең «Япеева» бүлегенә 65 яшьлек ир-ат мөрәҗәгать иткән. Ул үзенең автомобиленнән портфелен урлап китүләрен хәбәр иткән. «Татар-информ» агентлыгына Россия Эчке эшләр министрлыгының Казан шәһәре буенча идарәсе матбугат хезмәтендә шул турыда сөйләделәр.
Гариза бирүче сүзләренә караганда, ул үз автомобилен Пушкин урамында калдырган. Машинасы янына кире килгәч, тәрәзәнең ватылган булуын һәм машинадан документлар, шәхси әйберләр салынган портфель югалуын күрә. Урланган әйберләренең бәясен ул 62 мең сумга бәяли.
Агентлыкка мәгълүм булганча, машина – түрәнеке.
Әлеге фактка карата «Урлау» маддәсе буенча җинаять эше кузгатылды. Полиция хезмәткәрләре җинаятькә катнашы булган кешеләрне эзли.