Төмән өлкәсенең Вагай авылында мәчет төзелә башлады
Мөфти Зиннәт хәзрәт Садыйков Төмән өлкәсенең Вагай районы Вагай авылында мәчет төзелеше башлануына старт бирде, дип хәбәр ителә Россия Мөфтиләр шурасы сайтында.
Бу мизгелне авыл халкы берничә ел көткән. Меценатлар һәрьяклап ярдәм күрсәтергә әзер булуларын белдергән. Район хакимияте җирле мөселман дини оешмасы тәкъдимен уңай кабул итә. Ә Төмән өлкәсе мөселманнарының Диния нәзарәте җитәкчелеге башта проект-смета документларын, кишәрлекне рәсмиләштерергә кирәклеген искәртә.
Булачак мәчет урынында мөфти Зиннәт хәзрәт Садыйков белән бергә Вагай районы мөхтәсибе Әхмәт хәзрәт Ишмөхәммәтов, Тубыл шәһәре һәм районы имам-мөхтәсибләре, җирле дини оешма мөселманнары өйлә намазын укып, изге эшкә хәер-фатиха теләп дога кылды.
Вагай районы хакимияте рәисенең беренче урынбасары Александр Сафрыгин чыгыш ясап, район үзәгендә мөселман гыйбадәтханәсенең җитмәве күптән сиздереп торуын искәртте һәм төзелеш эшендә уңышлар теләде.
Рәсми затлар чыгышыннан соң булачак мәчеткә нигез салынды.
Әлеге мәчет уку һәм дини йолалар башкару өчен билгеләнгән биналар комплексының бер өлеше булачак.