Икътисад министрлыгы: Республиканың азык-төлек базарында вазгыять тотрыклы
Республиканың азык-төлек базарында товар запаслары буенча вазгыять тотрыклы, дип хәбәр итте бүген Татарстан Республикасы Премьер-министры урынбасары – ТР икътисад министры Мидхәт Шаһиәхмәтов. Бу хакта ул Министрлар Кабинетында Рөстәм Миңнеханов уздырган киңәшмәдә белдерде.
«Сәүдә челтәрләрендә һәм бүлү үзәкләрендә төп товарларның күләме ихтыяҗны канәгатьләндерү өчен җитәрлек», – дип билгеләп үтте Шаһиәхмәтов.
Аның сүзләренә караганда, республика халкын азык-төлек белән тәэмин итүне Икътисадны тотрыклы үстерү буенча оператив штабның эшче төркеме даими контрольдә тота.