Новости за 29.11.2023

Апас районы башлыгы Айрат Җиһаншин тәкъдиме белән Татарстанның халык шагыйре Шәүкәт Галиевның исеме мәңгеләштерелде. Яңа урамга аның исеме бирелде һәм истәлек тактасы куелды. Бу хакта «Апастово-информ» хәбәр итә.

28 ноябрьдә Уфа «Нур» татар дәүләт театрында режиссер Алмаз Нургалиевның «Җылак» нәфис фильмы киң җәмәгатьчелеккә тәкъдим ителде.

Бүген Татарстан Республикасы Рәисе Рөстәм Миңнеханов эш сәфәре белән Мәскәүгә килде. Ул Иван Сеченов исемендәге дәүләт медицина университетында булды. Югары уку йорты ректоры, медицина фәннәре докторы Петр Глыбочко белән берлектә республика җитәкчесе Covid-19 пандемиясе вакытында һөнәри бурычын үтәп һәлак булган табиблар һәм медицина хезмәткәрләре һәйкәленә чәчәкләр салды. Татарстан Республикасының Россия Федерациясендәге Тулы вәкаләтле вәкиллеге чәчәк салу күренешен күрсәтте.

Россия Президенты Владимир Путин аспирантлар өчен стипендияләрне 75 мең сумга кадәр арттыру турында белдерде. Бу хакта ул III Яшь галимнәр конгрессында катнашучылар белән очрашуда сөйләде.

30 ноябрьдән 3 декабрьгә кадәр Мәскәүдә «Нон-фикшн» төрле жанрдагы интеллектуаль әдәбият ярминкәсе узачак. Чарада Татар китап нәшрияты да үз бестселлерларын тәкъдим итәр дип көтелә.

Дәүләт Думасы депутатлары 16 яшькә кадәрге бала тәрбияләүче ялгыз ана һәм аталарны эштән азат итүне тыю инициативасын беренче укылышта хуплады. Төзәтмәләрне Хезмәт кодексына кертергә тәкъдим ителә. Бу хакта парламент түбән палатасының матбугат хезмәте хәбәр итә.

Күп балалы гаиләләргә бушлай фатирлар бирергә кирәк. Мондый тәкъдим белән Татарстан Республикасында Бала хокуклары буенча вәкаләтле вәкил Ирина Волынец чыгыш ясады. Бу хакта балалар омбудсмены үзенең Телеграм-каналында Daily Storm басмаларына сылтама белән хәбәр итә.

КФУның Филология һәм мәдәниятара багланышлар институтында язучылар Аяз Гыйләҗев һәм Арпад Галгоциның 95 еллыгына багышланган «Халыклар күңеленә үтеп керик!» кичәсе булды. Кичәне КФУ доценты, әдәбият галиме Миләүшә Хәбетдинова алып барды.

2024 елда Татарстанның Мәҗбүри медицина иминияте территориаль фондының керем һәм чыгымнары 79,6 млрд сумнан артык тәшкил итәчәк. Шулай итеп, бу чорга бюджет дефицитсыз кабул ителгән. Бу — республика Рәисе Рөстәм Миңнеханов имзалаган законнан күренә.

Татарстан Рәисе Рөстәм Миңнеханов республика шефлыкка алган фронт янындагы Лисичанск һәм Рубежное шәһәрләренә гуманитар йөк илтүне шәхси контролендә тота. Инде ел ярым дәвамында бу шәһәрләрне торгызуга күзәтчелек итүче Татарстан вице-премьеры Евгений Варакин шулай дип белдерде.

Татарстан Республикасы 8-11 нче сыйныф укучылары Россия халыклары туган телләре һәм әдәбияты буенча III Федераль олимпиадада катнашып, үз белемнәрен сынап карый ала. 11 нче сыйныф укучылары өчен Казан федераль университетына укырга кергәндә ташламалар каралган.

Татарстан Рәисе Рөстәм Миңнеханов Мәскәүдә Иван Сеченов исемендәге дәүләт медицина университетында булды, анда укучы Татарстан студентлары белән очрашты. Бу хакта ул үзенең телеграмм-каналында язган.

Омск шәһәрендә «Татар кызчыгы – 2024», «Татар малае – 2024» бәйгесе узачак. II Төбәк балалар бәйгесендә катнашуга гаризалар кабул ителә, дип яза «ВКонтакте» социаль челтәре сәхифәсендә Омск татарлары.

2024 елда Татарстан бюджеты дефицитсыз булачак — аның фаразланган кереме һәм чыгымнары 399 599 130,1 мең сум (якынча 400 млрд сум) күләмендә расланган. Бу хакта республика Рәисе Рөстәм Миңнеханов имзалаган законда язылган.

2023 елның ун ае нәтиҗәләре буенча Татарстанда 9 бала туу очрагына 10 үлем очрагы туры килә. Төбәктә халык санын арттыру өчен 1 үлүчегә кимендә 2 бала туу туры килергә тиеш, дип яза «Татар-информ».

Мәгариф һәм фән өлкәсендә күзәтчелек буенча федераль хезмәт (Рособрнадзор) башлыгы Анзор Музаев, бердәм дәүләт имтиханнарын онлайн-форматка күчерү тәкъдиме турында сөйләгәндә, алдагы биш-ун елда моны эшләү планлаштырылмый дип белдерде. Әмма киләчәктә мондый мөмкинлекне кире какмады. Бу хакта РИА Новости яза.

Бүген, 29 ноябрь, Курган өлкәсенең Йолдыз авылы делегатлары өчен мәдәни программа оештырылды. Делегатлар арасында: Эльвира һәм Кәлимулла Миңнегәрәевләр, укытучы Гөлсимә Байтирәкова һәм мәктәп укучылары бар, дип хәбәр итте Бөтендөнья татар конгрессы.

Татарстанның балалар омбудсмены Ирина Волынец биш һәм аннан күбрәк бала тапкан һәм тәрбияләүче хатын-кызлар өчен иминият стажын исәпләү буенча чикләүне гамәлдән чыгарырга тәкъдим итте. Дәүләт Думасының гаилә, хатын-кызлар һәм балалар комитеты рәисенең беренче урынбасары Татьяна Буцкаяга шул хактагы мөрәҗәгатьне юллаганнар инде, дип яза RT.

Татарстан Рәисе Рөстәм Миңнеханов Мәскәү өлкәсенә эш сәфәре кысаларында «Гринвуд» бизнес-паркында булды һәм Кытайның эшлекле даирәләре вәкилләре белән очрашты. Рөстәм Миңнеханов республика территориясендә бизнес-парк филиалы ачу мөмкинлеген карарга тәкъдим итте. Бу турыда Татарстан Рәисенең матбугат хезмәте хәбәр итте.

Татар театрының күренекле актрисасы, Россиянең атказанган һәм ТАССРның халык артисты Наилә Гәрәева вафат булу сәбәпле, ТР җитәкчелеге кайгы уртаклашты.

Санкт-Петербургның «БИАР» китапханәсендә (Тамбасов урамы, 1) Татарстан Республикасына багышланган милли мәдәниятләр фестивале булды. Чараны «Акчарлак» татар фольклор ансамбле җитәкчесе Светлана Җиһангирова оештырды. Бу хакта Татарстанның Санкт-Петербург шәһәре һәм Ленинград өлкәсендәге Даими вәкиллеге матбугат хезмәте хәбәр итә.

Бүген Татарстан Дәүләт Советы Рәисе Фәрит Мөхәммәтшин Казанда «Хакимият белән диалоглар» проекты кысаларында традицион гаилә кыйммәтләрен саклау һәм ныгыту проектларын гамәлгә ашыручы иҗтимагый оешма вәкилләре белән очрашты. Очрашуда Татарстанның 27 муниципаль берәмлегеннән коммерцияле булмаган тармак вәкилләре катнашты.

28 ноябрьдә Казанда керәшеннәрнең Яков Емельянов исемендәге мәдәни үзәгендә Сарман районы керәшеннәре айлыгын йомгаклау концерты булды. Сарман – үзәкнең «Якын дуслар җыелышкач» дигән проектында катнашкан 20нче район. Бу проект кысаларында мәдәни үзәктә һәр айны бер районның керәшеннәренә багышланган айлык уза.

Татарстан Фәннәр академиясенең Шиһабетдин Мәрҗани исемендәге Тарих институты ТР Дәүләт флагы көне уңаеннан урнаштырылган видеода төрле чорлардагы татар дәүләтләренең әләмнәрен күрсәтте.

Самараның «Бердәмлек» газетасында Нәҗибә Шәйхетдинованың «Көзге алтын юллар ята, күңел туган якка тарта» дигән язма чыкты.