Новости за 15.12.2022

Татарстанның дәүләт хезмәткәрләре мобилизация буенча хәрби хезмәткә чакырылган, армиядә хезмәт итү турында контракт яки РФ Кораллы көчләренә йөкләнгән бурычларны хәл итүдә ирекле рәвештә ярдәм күрсәтү турында килешү төзелгән очракта өстәмә гарантияләр алачак. ТР Дәүләт Советының 38нче утырышында шул хактагы закон проекты кабул ителде.

Стопкоронавирус.рф порталы мәгълүматларыннан күренгәнчә, соңгы тәүлектә Татарстанда коронавирус инфекциясенең 103 яңа очрагы ачыкланган.

Татарстан Президенты Рөстәм Миңнеханов «Россия лидерлары» идарәчеләр бәйгесендә җиңгән татарстанлылар белән очрашты. Очрашу республика Хөкүмәте йортында узды.

Гадел һәм ышанычлы гаммәви мәгълүмат чаралары Россиягә каршы фейк-һөҗүмнәр дулкыны белән көрәштә зур әһәмияткә ия, дип саный ТР Президенты Рөстәм Миңнеханов. Махсус хәрби операция үткәрү һәм Россиягә моңарчы күрелмәгән басым шартларында матбугат чараларының роле тагын да арта, дип искәртте ул Татарстанның Россиядәге Вәкаләтле вәкиллеге каршындагы медиаклуб утырышында.

Чаллы язучысы һәм шагыйрә Әлфия Ситдыйкованың «КамАЗ» заводын төзүчеләр турындагы «Дөнья тәгәрмәче» повесте Төркиядә нәшер ителде.

Бүгенге көннән Татарстанда ОРВИ һәм грипп белән авыручылар арту сәбәпле кайбер чикләүләр кертелә, шул исәптән республикага битлек кию режимы әйләнеп кайтты. Республиканың баш санитар табибы Марина Патяшина имзалаган карарда шул хакта хәбәр ителә.

Күренекле язучы Айдар Хәлимнең 80 яшьлеге уңаеннан иҗат кичәсен шигырьләре белән юбиляр үзе башлап җибәрде.

2023 елда IX сыйныф укучылары төп дәүләт имтиханын 24 майдан 1 июльгә кадәр (төп этап) тапшырачак. Мәгариф министрлыгының хокукый мәгълүмат порталында урнаштырылган боерыгында шул хакта хәбәр ителә.

Казанда VII Халыкара Алтын Урда форумы уза.

Кама Тамагы районында башы имгәнгән җиде айлык малайны хастаханәгә китергәннәр. Бала имгәнү сәбәпләрен тикшерү башланды. Россия Тикшерү комитеты рәисе Александр Бастрыкин Татарстан Республикасы буенча Тикшерү идарәсе җитәкчесенә әлеге эшне тикшерү турында турында хәбәр итәргә кушты.

Цифрлы үсеш, элемтә һәм массакүләм коммуникацияләр министрлыгы чит илгә киткән IT-белгечләрнең читтән торып эшләвен тыюны хупламады. Мондый инициатива, цифрлы платформалар һәм карарларның үсеш темпларын киметеп, аларның көндәшлеккә сәләтлелеген куркыныч астына куячак.

«Бер томда татар теленең төп лексикасын һәм грамматикасын өйрәнеп була», - диде Мидзуки Сакурама.

Кичә Татарстанның Лаеш районында, Казан – Оренбург трассасының 66нчы километрында юл-транспорт һәлакәте булган. Бу хакта республика Дәүләт автоинспекциясе хәбәр итә.

Омскида «Без татар гаиләсе» – «Мы татарская семья» бәйгесе җиңүчеләрен игълан иттеләр. Бәйген Омскиның татар милли-мәдәни мохтарияте «Ибир» оештырды.

Удмуртия татарларының «Яңарыш» сайтында Рәфилә Рәсүлеваның «Ижауда – «Зәңгәр шәл» фестивале» дигән язмасы чыкты.

Татарстан Республикасы Мәдәният министрлыгы Казан (Идел буе) федераль университеты белән берлектә «Тархан» 2022 тарихи-мәдәни конкурсын тәкъдим итә. Катнашучыларны теркәү 2022 елның 31 декабренә кадәр гамәлгә ашырыла.

Ульяновск өлкәсенең «Өмет» газетасында Рузия Хәлимованың «Өлкәбезнең үрнәк татар гаиләләре» дигән язмасы чыкты.

Чаллы дәүләт педагогика университеты белән Актаныш районы арасында хезмәттәшлек турында килешү төзелде. Аны муниципаль район башлыгы Ленар Зарипов һәм университет ректоры, икътисад фәннәре кандидаты, доцент Әлфинур Галиәкбәрова имзалады. Бу хакта Актаныш муниципаль районы матбугат үзәгенә сылтама белән «Актаныш-информ» хәбәр итә.

Түбән Кама мэры Рамил Муллин мөмкинлекләре чикле балаларга Яңа ел бүләкләре тапшырды. 

Зур Кукмарадагы «Ялкын» балалар-үсмерләр клубында 2005 елгы һәм аннан яшьрәк укучылар арасында милли көрәш буенча Россиянең спорт остасы, район Сабантуйларының ундүрт тапкыр баш батыры Нурсил Галиев призларына татарча көрәш ярышлары булды.

Аксубай районында агросәнәгать оешмалары арасында техниканы кышкы саклауга кую һәм машина-трактор паркларының авыл хуҗалыгы машиналарын ремонтлау чорына әзерлеге буенча конкурс үтте.

Зәйнең «Шатлык» балалар бакчасында «Әтиләр патруле» акциясе узды. Һәр уку елы дәвамында балалар бакчасы педагогик коллективы балалар һәм аларның ата-аналары белән юл хәрәкәте кагыйдәләрен белү дәрәҗәсен күтәрү һәм балалар юл-транспорт травматизмын булдырмау буенча профилактик эш алып бара.