ნიკოლ ფაშინიანმა უარი თქვა მინსკში ОДКБ-ს სამიტში მონაწილეობაზე
ფაშინიანმა სამიტზე ჩაუსვლელობის შესახებ განაცხადა მასპინძელი ქვეყნის პრეზიდენტ ალიაქსანდრ ლუკაშენკასთან სატელეფონო საუბარში. სომხეთის პრემიერ-მინისტრმა "იმედი გამოთქვა, რომ მისი კოლეგები გაგებით შეხვდებიან მის ამ გადაწყვეტილებას", - ნათქვამია სომხეთის მთავრობის პრესსამსახურის განცხადებაში.
რუსულ მედიასთან კომენტარში, რუსეთის ფედერაციის პრეზიდენტის პრესმდივანმა დიმიტრი პესკოვმა განაცხადა, რომ კრემლმა არ იცოდა ფაშინიანის ამ გადაწყვეტილების შესახებ. "თუ ეს მართლაც ასეა, მაშინ შეგვიძლია სინანული გამოვხატოთ", - აღნიშნა პესკოვმა.
ამრიგად, 2009 წლის შემდეგ სომხეთი პირველად არ მიიღებს მონაწილეობას მოსკოვის ლიდერობით მოქმედი საერთაშორისო ორგანიზაციის სამიტში.
სექტემბრის დასაწყისში სომხეთის პრემიერ-მინისტრმა ნიკოლ ფაშინიანმა „სტრატეგიული შეცდომა“ უწოდა უსაფრთხოების სფეროში სომხეთის მხოლოდ ერთ ქვეყანაზე, კერძოდ, რუსეთზე დამოკიდებულებას. გამოცემა La Repubblica-სთან ინტერვიუში ფაშინიანმა მთიან ყარაბაღში რუსული სამშვიდობო კონტინგენტი გააკრიტიკა და განაცხადა, რომ ის თავის ამოცანას არ ასრულებს.
სომხეთი რჩება კოლექტიური უსაფრთხოების ხელშეკრულების ორგანიზაციის სამხედრო ალიანსის წევრად. იგი აერთიანებს რუსეთსა და რიგ სხვა ქვეყნებს, მაგრამ მის ფარგლებში თანამშრომლობა ფაქტობრივად გაყინულია. სომხეთმა უარი თქვა ამ ორგანიზაციის ფარგლებში წვრთნების ჩატარებაზე თავის ტერიტორიაზე, ხოლო გასულ წელს ორგანიზაციის ერევანში გამართულ სამიტზე უარი თქვა ხელი მოეწერა ერთობლივ დოკუმენტებზე, რადგან, ერევნის თანახმად, მოკავშირეებმა სომხეთს არ გაუწიეს საკმარისი მხარდაჭერა ყარაბაღის გარშემო განვითარებულ სიტუაციაში.