რუსთავის სამშობიარო სახლის დირექტორი მილიონს ითხოვეს პატივისა და ღირსების შელახვისათვის

შპს „რუსთავის სამშობიარო სახლის“ ასპროცენტიანი წილის მფლობელი ალექსანდრე ბარავკოვი მორალური ზიანის ანაზღაურებისთვის  500-500 ათას ლარს ითხოვს გაერთიანებული პროფკავშირების თავმჯდომარის მოადგილე ლავრენტი ალანიასა და პროფკავშირების რეგიონული ლიდერის გიორგი ტყემალაძისგან.



რუსთავის სასამართლოში შეტანილ სარჩელში ალექსანდრე ბარავკოვი აღნიშნავს, რომ მოპასუხის მიერ მედიით და სოციალურ ქსელებში გავრცელებული განცხადებები, თითქოს სამშობიარო სახლის თანამშრომლები უხელფასოდ და  დისკრიმინაციულ პირობებში მუშაობენ,  ცილისმწამებლურია და არ შეესაბამება სიმართლეს. ის აქვე უთითებს გიორგი ტყემალაძის მიერ ფეისბუკში გაკეთებულ ერთ-ერთ ჩანაწერს, სათაურით „ბარავკოვი კლავს“, რომელიც შეეხება კლინიკის თანამშრომლებისთვის 600 ათასზე მეტი ლარის ოდენობის სახელფასო დავალიანებას.



სამშობიარო სახლის მფლობელი, რომელმაც შრომის ინსპექციის დასკვნა სასამართლოში გაასაჩივრა,  ასევე აცხადებს, რომ ლავრენტი ალანია და გიორგი ტყემალაძე გამოთქვამდნენ ცილისმწამებლურ ბრალდებებს  გაერთიანებული  პროფკავშირების მიერ ორგანიზებულ აქცია-პერფორმანსებზე. სახელფასო დავალიანების დაფარვის  მოთხოვნით, 20 სექტემბერს გამართული აქციის  შემდეგ, შრომის ინსპექცია სამშობიარო სახლში შევიდა. შემოწმების შედეგად ინსპექციამ დარღვევები გამოავლინა. კერძოდ, დასკვნის თანახმად,  2020 წლის ივნისიდან, ერთი წლის განმავლობაში, შპს „რუსთავის სამშობიარო სახლში“, სადაც 129 თანამშრომელია დასაქმებული, ხელფასი მხოლოდ ორ მათგანს ერიცხებოდა.  ინსპექციამ შრომითი პირობების დარღვევის სხვა ფაქტებიც აღმოაჩინა.  




პროფკავშირების რეგიონულმა წარმომადგენელმა გიორგი ტყემალაძემ რადიო თავისუფლებას უთხრა, რომ ბარავკოვს პროცესის მოგების იმედი არ უნდა ჰქონდეს, რადგან მას საჯაროდ  აბრალებდნენ, შრომის ინსპექციამ დაადასტურა. 

„შეხვდებით სასამართლოში, იქ დავამტკიცებთ, რომ მართლები ვართ“, თქვა ტყემალაძემ. გაერთიანებული პროფკავშირების თავმჯდომარემ ლავრენტი ალანიამ კი რადიო თავისუფლებას უთხრა, რომ ღირსებას ბარავკოვი ლახავს, როცა ხელფასებს თვეობით არ აძლევს დასაქმებულებს.