აშშ-სა და საფრანგეთში COVID-19-ის შემთხვევების სარეკორდო მატებაა, WHO შესაძლო "ცუნამიზე" ლაპარაკობს
29 დეკემბერს აშშ-ში ერთი კვირის განმავლობაში გამოვლენილი COVID-19-ის ახალი შემთხვევების საშუალო მაჩვენებელმა სარეკორდო დონეს მიაღწია, იტყობინება ჯონს ჰოპკინსის უნივერსიტეტი.
ერთ დღე-ღამეში გამოვლენილი ახალი შემთხვევების სარეკორდო რაოდენობა აღინიშნა საფრანგეთში, განაცხადა 29 დეკემბერს ჯანდაცვის მინისტრმა ოლივიე ვერანმა.
WHO-ს თქმით, 22-28 დეკემბრის ერთკვირიან მონაკვეთში მსოფლიო მასშტაბით გამოვლენილია კორონავირუსით ინფიცირების 6,55 მილიონი შემთხვევა. ეს ყველაზე მაღალი მაჩვენებელია პანდემიის დასაწყისიდან მოკიდებული.
მედიკოსთა თანახმად, „ომიკრონი“ კორონავირუსის დღემდე ცნობილ ვარიანტებს შორის ყველაზე უფრო გადამდებია და მას უნარი შესწევს, ე.წ. „გარღვევითი ინფექცია“ გამოიწვიოს იმ ადამიანებშიც, რომლებსაც ვაქცინაცია აქვთ ჩატარებული ან უკვე გადატანილი აქვთ ინფექცია.
WHO-ს გენერალურმა დირექტორმა ტედროს ადჰანომ ღებრეიესუსმა „დელტას“ და „ომიკრონს“ უწოდა „ტყუპი საფრთხე“, რომელიც ინფიცირების სარეკორდოდ ზრდას იწვევს, რაც თავის მხრივ იწვევს ჰოსპიტალიზაციისა და სიკვდილის შემთხვევათა მატებას. ტედროსის თქმით, ის „ძალიან შიშობს“, რომ „დელტას“ პარალელურად „ომიკრონის“ გავრცელებას „ინფიცირების შემთხვევათა ცუნამისკენ მივყავართ“.