ლიეტუვა მზად არის უკრაინას ლეტალური იარაღი გადასცეს
ლიეტუვის ნაციონალური თავდაცვის მინისტრი, არვიდას ანუშაუსკასი აცხადებს, რომ მისი ქვეყანა მზადაა ლეტალური საბრძოლო იარაღია გადასცეს უკრაინას, რომელიც რუსეთის მზარდი აგრესიის საფრთხის წინაშე იმყოფება.
„უკრაინას ყოველმხრივი დახმარება ესაჭიროება და ლიეტუვა მზად არის ამისათვის, მათ შორის ლეტალური იარაღის გადაცემისთვისაც“, - განაცხადა ანუშაუსკასმა 19 დეკემბერს რუკლეში ყოფნის დროს. ამავე დროს ლიეტუველ მინისტრს არ დაუკონკრეტებია, თუ როდის და რა სახის საბრძოლო იარაღის გადაცემა აქვს უკრაინისათვის ლიეტუვას განზრახული.
„ახლა მე პირდაპირ არ ვისაუბრებ ამ საკითხზე, რომელიც მრავალმხრივ შეთანხმებას საჭიროებს, ვინაიდან მასში არა მხოლოდ დონორი და შეიარაღების მიმღები, არამედ სხვა, მწარმოებელი და მიმწოდებელი ქვეყნებიც უნდა იყვნენ ჩართულები“, - განუცხადა ანუშაუსკასმა.
ლიეტუვის მზადყოფნაზე, რომ გადასცეს ლეტალური შეიარაღება უკრაინას, ანუშაუსკასმა კვირას, ლიეტუვაში სტუმრად მყოფ გერმანიის თავდაცვის მინისტრ, კრისტინა ლამბრეხტთან შეხვედრის შემდეგ გამართულ ერთობლივ პრესკონფერენციაზე ისაუბრა.
წინა დღით გერმანიის ახალმა თავდაცვის მინისტრმა, კრისტინა ლამბრეხტმა, განაცხადა, რომ პრეზიდენტ ვლადიმირ პუტინის გარემოცვის წევრებიც უნდა მოხვდნენ სანქციათა ახალ პაკეტში, რომელიც შესაძლოა ევროკავშირმა აამოქმედოს რუსეთის წინააღმდეგ უკრაინაში ფართომასშტაბიანი შეჭრის შემთხვევაში.
„ ვინც აგრესიაზე აგებენ პასუხს, პირადად უნდა იგრძნონ შედეგი, რომ, მაგალითად, მათ ვეღარ უნდა შეძლო საყიდლებზე პარიზში ელისეს მინდვრებზე სიარული“, - განაცხადა ლამბრეხტმა გაზეთ „ბილდისთვის“ მიცემულ ინტერვიუში.
აშშ-მა და ევროპის კავშირმა რუსეთი „უზარმაზარი შედეგების“ თაობაზე გააფრთხილეს უკრაინის წინააღმდეგ სამხედრო აგრესიის შემთხვევაში და დიპლომატიური გზებით დაძაბულობის დეესკალაციისკენ მოუწოდეს.
აშშ-ის ადმინისტრაციის მაღალი რანგის წარმომადგენელმა 17 დეკემბერს ჟურნალისტებთან საუბარში თქვა, რომ აშშ და ევროპა ზომებს ამზადებენ რუსეთის დასასჯელად, თუკი კრემლი სამხედრო ძალას გამოიყენებს თავისი მცირე მეზობლის წინააღმდეგ.
როგორც აცხადებენ, უკრაინის ტერიტორიაზე რუსეთის ჯარები შეიძლება იანვრის ბოლოს შეიჭრან. კიევი მოსკოვს ბრალს სდებს უკრაინის საზღვრებთან რუსეთის 90 ათასზე მეტი სამხედრო მოსამსახურის თავმოყრაში.
რუსეთმა ადრე უკვე განახორციელა უკრაინის წინააღმდეგ აგრესია. 2014 წელს მან დაიკავა უკრაინის კუთვნილი ყირიმის ნახევარკუნძული და მისი ანექსირება მოახდინა. ამავე პერიოდიდან ის დახმარებას უწევს სეპარატისტებს აღმოსავლეთ უკრაინაში. დონბასის რეგიონში საბრძოლო მოქმედებებს დღემდე 13200-ზე მეტი ადამიანი ემსხვერპლა.