უკრაინა აცხადებს, რომ რუსეთს ბლოკირებული აქვს აზოვის ზღვის დიდი ნაწილი
„ამჟამად რუსეთმა გაავრცელა სანავიგაციო გაფრთხილება გარკვეულ რაიონში გემების ცურვის შეზღუდვის შესახებ, სავარაუდოდ, მარიუპულის, ბერდიანსკისა და გენიჩესკის რაიონების მახლობლად საარტილერიო სროლების გამო“, - ნათქვამია უკრაინის სამხედრო-საზღვაო ძალების მიერ 10 დეკემბერს გავრცელებულ განცხადებაში.
რუსეთის მხარეს ეს მტკიცებულება დღემდე არც დაუდასტურებია და არც უარუყვია. თავის მხრივ, 9 დეკემბერს რუსეთის უშიშროების ფედერალურმა სამსახურმა განაცხადა, რომ აღმოაჩინეს უკრაინული გემი, რომელიც უნებართვოდ მიემართებოდა ქერჩის სრუტისკენ, რასაც კიევმა უწოდა უკრაინის წინააღმდეგ მიმართული „საინფორმაციო ომის“ ნაწილი.
აზოვის ზღვა - შიდა ზღვაა, რომელიც აღმოსავლეთიდან რუსეთს, ხოლო დასავლეთიდან უკრაინას ესაზღვრება. ქერჩის სრუტით აზოვის ზღვა უკავშირდება შავ ზღვას, სადაც რუსეთს რეგიონში უდიდესი სამხედრო ფლოტი ჰყავს განლაგებული და, ბოლო ინფორმაციით, აგრძელებს საოკუპაციო ძალების გაძლიერებას, 2014 წლის გაზაფხულზე ანექსირებულ ყირიმის ნახევარკუნძულზე.
ქერჩის სრუტეში გავლის გამო, 2018 წლის ნოემბერში რუსეთმა ხელთ იგდო უკრაინის სამი სამხედრო კატარღა და დაატყვევა 24 მესაზღვრე, რომელთა გათავისუფლება უკრაინასა და რუსეთს შორის მრავალთვიანი მოლაპარაკების შედეგად პატიმართა დიდი გაცვლის შესახებ მიღწეული შეთანხმებით გახდა შესაძლებელი.