ზელენსკი არ გამორიცხავს პუტინთან პირდაპირი მოლაპარაკებების შესაძლებლობას
როგორც ზელენსკიმ თქვა, მან უწყება მიიღო აშშ-ის პრეზიდენტისგან და ის მდგომარეობს იმაში, რომ „რუსეთმა შეერთებულ შტატებს და მთელს მსოფლიოს მისცა პირობა, რომ არ აპირებს ესკალაციის გაგრძელებას. ჩემი აზრით, დღეს ეს თუმცა მცირე, არა საბოლოო, მაგრამ მაინც ძალიან მნიშვნელოვანი შედეგია,“ თქვა უკრაინის პრეზიდენტმა პარასკევს საღამოს ტელეარხ "1+1"-ის ეთერში.
ამავე ინტერვიუში ზელენსკიმ არ გამორიცხა რუსეთის პრეზიდენტ ვლადიმირ პუტინთან პირდაპირი მოლაპარაკებების შესაძლებლობა. მან აღნიშნა, რომ ამაში მას მხარს უჭერენ პარტნიორები ევროკავშირსა და აშშ-ში.
რუსეთის საგარეო საქმეთა სამინისტრომ პარასკევს გამოაქვეყნა განცხადება „აშშ-სთან და დასავლეთის სხვა ქვეყნებთან დიალოგის შესახებ, უსაფრთხოების გარანტიების შემუშავებასთან მიმართებით.“ ადრე იტყობინებოდნენ, რომ ასეთი გარანტიების თემას შეეხნენ ბაიდენსა და რუსეთის პრეზიდენტ ვლადიმირ პუტინს შორის სატელეფონო საუბრისას, რომელიც 7 დეკემბერს გაიმართა. საქმე ეხება მოსკოვის შეშფოთებას ნატოში უკრაინის შესაძლო წევრობის გამო.
მოსკოვში არ ეთანხმებიან დასავლეთის მტკიცებას, რომ ნატოში უკრაინის წევრობის საკითხი მხოლოდ და მხოლოდ კიევისა და ჩრდილოატლანტიკური საბჭოს გადასაწყვეტია.
„ევროპის უსაფრთხოების ძირეული ინტერესებისთვის აუცილებელია ოფიციალურად უარყოფილ იქნეს ნატოს 2008 წლის ბუქარესტის სამიტის გადაწყვეტილება იმის თაობაზე, რომ ‘უკრაინა და საქართველო’ ნატოს წევრები გახდებიან,“ ნათქვამია რუსეთის საგარეო საქმეთა სამინისტროს განცხადებაში.